Ўзбекистон Ғазода ўт очишни тўхтатиш бўйича АҚШ ташаббусини олқишлайди — ТИВ

Ўзбекистон АҚШ президенти Жо Байден эълон қилган ўт очишни тўхтатиш режасини олқишлайди.

Ташқи ишлар вазирлиги матбуот котиби Ахрор Бурхоновнинг билдиришича, Ўзбекистон можароларни фақат тинч йўл ва барча мавжуд дипломатик воситалар ёрдамида ҳал қилиш тарафдори.

“Шу муносабат билан, инқирозни тинч йўл билан ҳал қилиш бўйича халқаро саъй-ҳаракатлар муҳим аҳамият касб этади. Биз барча мамлакатларнинг ҳаракатларини, жумладан, АҚШнинг ўт очишни тўхтатиш, гаровга олинганларни озод қилиш ва тинч ҳаётни тиклаш бўйича ташаббусини олқишлаймиз”, — деди Ахрор Бурхонов.

Унинг билдиришича, ТИВ Ғазо секторида тинч аҳоли, айниқса, аёллар ва болалар қурбонлари бўлган тўқнашувларни диққат билан кузатмоқда. Бу ҳолат чуқур хавотирга солмоқда.

Вазирлик барча томонларни вазминликка, халқаро ҳуқуқни ҳурмат қилишга, зўравонликни олдини олишга ва тинч аҳоли орасида қурбонлар сонининг янада кўпайишига йўл қўймасликка чақиради. 

Июнь бошларида Исроил АҚШ президенти Жо Байден томонидан таклиф этилган урушни тугатиш ва Ғазо секторидаги можарони ҳал этиш режасини қабул қилди. 

Байден таклиф қилган режага кўра, можарони ҳал этиш уч босқичда амалга ошиши лозим:

• олти ҳафталик оташкесим, унинг давомида гаровга олинганлар озод қилинади ва Ғазо секторига инсонпарварлик ёрдами етказилади;
• жанговар ҳаракатларни тўлиқ тўхтатиш, Исроил қўшинларини Ғазодан тўлиқ олиб чиқиб кетиш ва конфликтга борган томонлар ўртасида музокаралар бошлаш;
• уруш пайтида вайрон қилинган ҳудудларни тиклаш.

Фаластиннинг ҲАМАС ҳаракати ўт очишни тўхтатиш ва Исроил қўшинларини Ғазодан олиб чиқиб кетиш таклифини олқишлашини билдирди.