Исроил билан ҳарбий кескинлик бошланганидан бери Ғазо секторида ишсизлик даражаси 80 фоизга етган. Бу ҳақда Халқаро меҳнат ташкилоти (ХМТ) эълон қилган баёнотга асосланиб, Al Jazeera нашри хабар берди.
Халқаро меҳнат ташкилоти ишсизлик даражасини расман 79,1 фоиз этиб белгилаган. Ғазодаги аҳолини меҳнат фаолияти ва даромад билан таъминлаб турган муассасаларнинг 90 фоизи вайрон қилингани хабар қилинган.
Ҳисоботда, шунингдек, оккупация қилинган Ғарбий Соҳилдаги ишсизлик даражасига ҳам ўрин берилган. Унда айтилишича, Ғарбий Соҳилнинг босиб олинган ҳудудларида ишсизлик даражаси қарийб 32 фоизни ташкил этган. Фаластиннинг Исроил назорати остида қолиб кетган ҳудудларидаги умумий ўртача ишсизлик даражаси 50,8 фоиз деб белгиланган.
Уруш бошланганидан бери реал ялпи ички маҳсулот Фаластин ҳудудида қарийб 33 фоизга қисқарган. Ғазо секторида эса ишлаб чиқаришнинг қарийб 83,5 фоизи йўқотилган.
Босиб олинган Фаластин ҳудудида ва, хусусан, Ғарбий Соҳилда даромадларнинг қисқариши кўплаб оилаларни оғир қашшоқликка олиб келди, — деган Халқаро меҳнат ташкилотининг араб мамлакатлари бўйича маҳаллий директори Руба Жарадат.
Фаластин Соғлиқни сақлаш вазирлиги расмийларига кўра, уруш бошланганидан бери Исроилнинг Ғазога ҳужумлари оқибатида камида 36 654 киши ҳалок бўлган. 83 309 киши жароҳат олган. Яна минглаб одамлар вайроналар остида бедарак йўқолгани хабар қилинган.
Изоҳ (0)