Украина президенти Владимир Зеленский Белгородда қулаб тушган ва бортида украин асирлари бўлгани айтилаётган Ил-76 самолёти ҳалокати бўйича халқаро текширув ўтказишни талаб қилди. Кремль матбуот котиби Дмитрий Песков тегишли таклифга жавоб берди. Бу ҳақда “ТАСС” хабар берди.
Песковга кўра, Россия ҳукумати Белгород яқинидаги Ил-76 ҳалокати бўйича халқаро тергов ўтказилишига рози бўлади, бироқ у Украина расмийларининг жинояти деб ҳисоблансагина.
“Агар у Киев режимининг жиноий ҳаракатлари бўйича халқаро текширув ўтказилишини назарда туца, албатта, зарур”, — дейди Песков.
Самолёт нега уриб туширилгани ва бу атайлаб қилинган ишми, деган саволга Песков қуйидагича жавоб берди:
“Сизда президент Зеленский администрациясининг телефон рақами бўлиши керак. Қўнғироқ қилинг ва шу саволни беринг”, — деди.
Кремль расмийсининг таъкидлашича, “украиналиклар ўз асирларини ўлдирганлар” ва бу, унинг фикрича, “даҳшатли акт”.
“Бу жараённинг давом этиш истиқболларига (асирлар алмашинуви — таҳр.) қандай таъсир қилишини ҳеч ким айтолмайди”, — деди у.
Песков нима бўлгани ҳали тўлиқ аниқ эмаслиги, терговчилар самолёт қолдиқларини ўрганишни бошлаганини қўшимча қилди.
Белгородда Ил-76 ҳалокати
24 январь куни Россиянинг Белгород вилоятида Ил-76 самолёти ҳалокатга учради. Россия Мудофаа вазирлигининг даъво қилишича, бортда 74 киши бўлган: 65 нафар украиналик ҳарбий асир, уч нафар рус аскари ва олти нафар экипаж аъзоси. Россия расмийларига кўра, уларнинг барчаси вафот этган.
Россия Мудофаа вазирлиги Ил-76 ҳалокатини теракт деб атади ва бунда Украина ҳарбийларини айблади. Украина ҳукумати ҳалокат учун жавобгарликни ўз зиммасига олмади, аммо самолёт ҳалокатида Россияни айбламади ҳам. “Украинская правда” нашри Украина Қуролли кучларидаги манбаларга таяниб, руслар Ил-76ъда Харьковга тез-тез ўқ узадиган С-300 ҳаво мудофаа тизими учун ракеталарни ташиганини маълум қилди.
Кейинчалик, Украина разведкаси 24 январь куни маҳбуслар алмашинуви бўлиши кераклигини тасдиқлади, аммо бу жараён тўхтатилди. Украина томонида Ил-76 бортида ким бўлгани ҳақида ишончли маълумотлар йўқлигини қўшимча қилди. Россия авиаҳалокатда пайтида ҳалок бўлган 65 нафар украиналик асирлар рўйхатини эълон қилди. Бироқ, украиналик журналистларга кўра, рўйхатдаги камида 17 киши 3 январь куни асирлар алмашинуви доирасида ватанига қайтган.
Ўз навбатида, Россия асирлар қайси йўналишда, транспортда ва неча киши бўлгани ҳақида Украинанини огоҳлантирмаган. Аввалги асирлар алмашинувида руслар украинларни бу борада огоҳлантириб келганди. Украина Хавфсизлик хизмати Ил-76 самолётининг ҳалокатга учраши бўйича тергов бошлаган.
Изоҳ (0)