Россиянинг Белгород вилояти Яблоново қишлоғи яқинида Ил-76 ҳарбий-транспорт самолёти ҳалокатга учради. Бу ҳақда “112” Telegram канали хабар берди. Телеканал таъкидлашича, бортда 63 киши бўлиб, уларнинг барчаси ҳалок бўлган. Ушбу маълумот расман тасдиқлагани йўқ. 63 кишининг ўлими ҳақида Россиянинг “ҳарбий мухбири” Юрий Котенок ҳам хабар берди. У ушбу маълумотларни қаердан олганини очиқламади.
Белгород вилояти губернатори Вячеслав Гладков Корочанский туманида “бахтсиз ҳодиса” содир бўлганини айтди. Аммо айнан нима бўлганига аниқлик киритмади.
“Ҳозирда воқеа жойида тергов гуруҳи ва Фавқулодда вазиятлар вазирлиги ходимлари ишламоқда. Иш жадвалимни ўзгартириб, ҳудудга бордим. Барча тафсилотлар кейинроқ”, — дейилади хабарда.
Кўп ўтмай Россия Мудофаа вазирлиги Ил-76 ҳалокатини тасдиқлади. Вазирлик маълумотларига кўра, бортда Украина Қуролли кучларининг асирликдаги 65 нафар ҳарбий хизматчиси бўлган, улар алмашиш учун Белгород вилоятига олиб кетилаётган эди, шунингдек, бортда экипажнинг олти нафар аъзоси ва уларнинг уч ҳамроҳи бўлган. Ҳарбий вазирликнинг маълум қилишича, самолёт режали парвоз вақтида ҳалокатга учраган. Аэрокосмик кучлар комиссияси “фалокат сабабларини аниқлаш учун” ҳалокат жойига учиб кетган.
Telegram каналлари Белгород яқинида самолёт ҳалокатга учрагани акс этган видеони чоп этди.
“Украинская правда” нашрининг Украина Қуролли кучларидаги манбаси хабар беришича, самолёт ҳалокати Украина ҳарбийларининг “иши” бўлган. Нашрнинг Бош штабдаги суҳбатдошларига кўра, самолёт С-300 ракеталарини олиб кетаётган эди. Бир оз ўтгач, “Украйинская правда” ўз янгиликларини таҳрирлади. Эндиликда фақат Украина Қуролли кучларидаги манба самолёт ҳалокатга учраганини тасдиқлагани айтилади. Нашрнинг Бош штабдаги суҳбатдошлари самолёт С-300 ҳаво ҳужумидан мудофаа тизими учун ракеталарни олиб кетаётганини даъво қилмоқда. Ил-76 нинг қулаши “Украина Қуролли кучларининг иши” бўлгани ҳақидаги гаплар олиб ташланган.
“112” Telegram-каналида Ил-76 ҳалокатга учраган жойдан олинган суратлар эълон қилинди. Самолёт Яблоново қишлоғидан беш-олти километр узоқликда қулаган, ерда ҳеч қандай вайронагарчилик йўқ. Бу ҳақда “ТАСС”га Яблоново қишлоғидаги Салоникалик Деметрий черкови ректори маълум қилди.
“Қишлоқда ҳеч нарса зарар кўрмади, у қишлоқ ташқарисида, далада, тахминан беш-олти километр узоқликда қулади”, — деди руҳоний.
SHOT ва Маsh каналларининг ёзишича, Россия ва Украина ўртасида 192 га192 форматида маҳбуслар алмашинуви 24 январь, чоршанба куни бўлиб ўтиши керак эди. Давлат Думаси Мудофаа қўмитаси раҳбари Андрей Картаполовнинг даъво қилишича, Белгород вилоятида ҳалокатга учраган самолётдан кейин украиналик маҳбуслар ўтирган яна бир Ил-76 ортга қайтган. Унинг сўзларига кўра, иккинчи самолёт 80 га яқин маҳбусни олиб учаётган эди.
Кремль самолёт ҳалокатига изоҳ бермади. “Бу жуда янги маълумот. Биз шу билан шуғулланяпмиз. Ҳозирча мен ҳеч нарса деёлмайман”, — деди Россия президенти матбуот котиби Дмитрий Песков журналистларга.
Изоҳ (0)