Бортида украиналик ҳарбий асирлар бўлгани айтилаётган Ил-76 рус ҳарбий самолёти ҳалокатга учрагани ҳақидаги илк хабарлардан 12 соат ўтиб, Украина президенти Владимир Зеленский фалокатга муносабат билдирди.
Зеленскийнинг сўзларига кўра, у Украина Мудофаа вазирлиги, Украина Қуролли кучлари, Украина хавфсизлик хизмати ва ҳарбий разведка вакилларига қўнғироқ қилиб, уларнинг самолёт ва айирбошлаш билан боғлиқ вазият бўйича ҳисоботларини тинглаган.
“Кўриниб турибдики, руслар украиналик маҳбусларнинг ҳаёти, уларнинг яқинларининг ҳис-туйғулари ва жамиятимиз ҳиссиётлари билан ўйнамоқда.
Барча фактлар аниқланиши керак. Самолёт Россия ҳудудида — бизнинг назоратимиздан ташқарида қулаганини ҳисобга олсак, иложи борича кўпроқ.
“Фактлар” — ҳозир асосий сўз. Ҳарбий ҳаво кучларидан фойдаланиш бўйича Бош қўмондон ва Бош штабни тингладим. Бош разведка бошқармаси барча маҳбуслар тақдирини текширмоқда. Хавфсизлик хизмати барча ҳолатларни ўрганмоқда. Ва мен Украина ташқи ишлар вазирига ҳамкорларни Украинадаги мавжуд маълумотлар ҳақида хабардор қилишни топширдим. Давлатимиз халқаро тергов ўтказилишини талаб қилади”, — деди Украина раҳбари.
Шу билан бирга Зеленский Россиянинг Ил-76 самолётини ким уриб туширган бўлиши мумкинлиги ва унинг қулаши сабаби ҳақида ҳеч қандай фикр билдирмади.
Россия Ил-76 ҳалокатида Украинани айбламоқда
Россиянинг Ил-76 ҳарбий-транспорт самолёти 24 январь куни эрталаб Белгород вилоятида ҳалокатга учради. Россия Мудофаа вазирлигининг маълум қилишича, бортда 74 киши бўлган: 65 нафар украиналик ҳарбий асир, уч нафар рус аскари ва олти нафар экипаж аъзоси. Россия расмийларига кўра, уларнинг барчаси вафот этган.
Россия Мудофаа вазирлиги Ил-76 ҳалокатини теракт деб атади ва бунда Украина ҳарбийларини айблади. Украина ҳукумати ҳалокат учун жавобгарликни ўз зиммасига олмади, аммо самолёт ҳалокатида Россияни айбламади ҳам. Украина ҳарбий разведкаси 24 январь куни Москва ва Киев асирларни алмашишга тайёрланаётганини тасдиқлади ва Украина томонида Ил-76 бортида ким бўлгани ҳақида ишончли маълумотлар йўқлигини қўшимча қилди.
“РБК-Украина” манбаларига кўра, фалокат ҳолатлари аниқланмагунча Зеленский мамлакатнинг марказий ҳудудларига сафарини бекор қилган ва уни туғилган куни билан табриклаш учун учрашувлар уюштиришни тақиқлаган. 25 январь куни Зеленский 46 ёшга тўлади.
Изоҳ (0)