“Украина ундай деяпти, Россия бундай”. Оқ уй Ил-76 ҳалокати сабаблари ҳақида етарлича маълумоти йўқлигини хабар қилди

АҚШ Белгород вилоятида Россиянинг Ил-76 ҳарбий самолёти ҳалокатга учраши ҳолатини текширмоқда, деди Оқ уй Миллий хавфсизлик кенгаши вакили Жон Кирби.

“Биз (самолёт ҳалокати ҳақидаги) хабарларни кўрдик, маълумот олишга ҳаракат қиляпмиз, аммо тахминларга асосланиб гапиришим номақбул бўлади. Бу хабарлар қанчалик ишончли эканини билмаймиз. Украина ундай деса, Россия бундай демоқда, биз етарлича билмаймиз”, — дейди Кирби.

Россиянинг Ил-76 ҳарбий-транспорт самолёти 24 январь куни эрталаб Белгород вилоятида ҳалокатга учради. Россия Мудофаа вазирлигининг маълум қилишича, бортда 74 киши бўлган: 65 нафар украиналик ҳарбий асир, уч нафар рус аскари ва олти нафар экипаж аъзоси. Россия расмийларига кўра, уларнинг барчаси вафот этган. Вазирлик Украина ҳарбийларини самолётни уриб туширганликда айблади.

Украина расмийлари уриб туширилган самолёт бортида украиналик ҳарбий асирлар борлиги ҳақидаги иддаоларни на тасдиқлади, на инкор қилди. Украина ҳарбий разведкаси Москва ва Киев маҳбусларни алмашишга тайёрланаётганини тасдиқлади. Агентлик Ил-76 бортида ким бўлгани ҳақида “ишончли ва тўлиқ маълумот”га эга эмаслигини билдирди.

Россия самолётининг қулаши фонида Украина Қуролли Кучлари Бош штаби украиналик ҳарбийлар Россия ракеталарининг учирилиш нуқталарини кузатишда давом этаётганини ва “қурол етказиб бериш воситаларини йўқ қилиш чораларини кўраётганини” маълум қилди.