24 январь куни Россия ва Украина ўртасида ҳарбий асирлар алмашинуви бўлиб ўтиши керак эди, бироқ Белгород яқинида Россиянинг Ил-76 самолёти ҳалокатга учраганидан кейин у бекор қилинди. Украина разведкаси бу борада баъзи тафсилотлар билан ўртоқлашди.
Разведка вакилларининг таъкидлашича, Россия томони ҳалокатга учраган самолётда Украина қуролли кучлари аскарлари бўлганини даъво қила бошлаган, шу сабабли кейинги тадбирлар бекор қилинган.
“Бизда самолёт бортида ким ва қанча миқдорда бўлгани ҳақида ишончли ва тўлиқ маълумот йўқ. Ўз навбатида, Украина асирлар алмашишга тайёргарлик кўриш бўйича барча келишувларни бажарган. Россиялик асирга олинган ҳарбий хизматчилар ўз вақтида келишилган нуқтага ва хавфсиз етказилган”, — дейди разведка.
Разведкачиларнинг қўшимча қилишича, асирга олинган Украина Қуролли кучлари аскарларининг хавфсизлиги учун Россия томони жавобгар бўлиши керак эди. Бундан ташқари, Украина томонига Белгород ҳаво ҳудуди хавфсизлигини таъминлаш зарурати ҳақида маълумот берилмаган. Бундай ёндашув аввалги алмашинувлар пайтида қўлланилган.
Шунингдек, руслар украиналикларни самолётлар сони, маршрутлари ва асирларни олдиндан келишилган жойга етказиш шакли ҳақида хабардор қилмаган. Асирлар алмашинуви ҳаво, темир йўл ва автомобиль транспортида амалга ошиши мумкин.
“Бу Россия қасддан маҳбусларнинг ҳаёти ва хавфсизлигига таҳдид яратишга қаратилган ҳаракатларни амалга оширганини кўрсатиши мумкин. Самолётининг 30 километрлик жанговар зонага қўниши хавфсиз бўлиши мумкин эмас ва ҳар қандай ҳолатда ҳам томонлар буни муҳокама қилиши керак, акс ҳолда бу бутун асирлар алмашинув жараёнига хавф туғдиради. Шунга асосланиб, Россиянинг Украинадаги вазиятни беқарорлаштириш ва давлатимиз учун халқаро қўллаб-қувватлашни заифлаштириш мақсадида режалаштирилган ва қасддан қилинган ҳаракатлари ҳақида гапиришимиз мумкин.”, — дейди Украина разведкаси.
Ҳалокатга учраган самолётда украиналик ҳарбий асирлар бўлгани ҳақидаги маълумот расман тасдиқланмаган.
Изоҳ (0)