Тошкентда фуқаронинг омонат ҳисоб рақамидаги пулларни ечиб олган шахслар қўлга олинди, деб хабар беради пойтахт ИИББ ахборот хизмати.
Қайд этилишича, фуқаро ИИББга мурожаат қилиб, омонат ҳисоб рақамида мавжуд бўлган 460 миллион сўм пул номаълум шахслар томонидан ечиб олинганини билдирган.
Мурожаат асосида олиб борилган тадбирлар давомида жиноий гуруҳ аъзолари жабрланувчининг шахсий маълумотларини қўлга киритган ҳолда унга тегишли пулларни мобил иловалар орқали ечиб олгани аниқланиб, жиноятчилар далилий ашёлар билан қўлга олинган.
Ҳозирда мазкур шахсларга нисбатан Жиноят кодексининг 169-моддаси (ўғирлик) билан жиноят иши қўзғатилган. Шунингдек, қўлга олинган шахсларнинг бошқа жиноятларга алоқадорлиги текширилмоқда.
.jpg)
Тошкент ИИББ мазкур фуқаролардан жабр кўрганлар бўлса, Тошкент шаҳар ИИББ Ахборот технологиялар соҳасидаги жиноятларга қарши курашиш бошқармасининг телефон рақамига (71 206 49 44) қўнғироқ қилиб, ариза беришни сўрамоқда.
Бундан олдин Сурхондарё вилоятининг Олтинсой ва Термиз туманларида 11 миллиард сўмдан ортиқ кредит маблағларини ўзлаштирган МЧЖ раҳбарлари аниқланганди. Шунингдек, Сурхондарё ва Фарғонада оилавий корхоналар раҳбарлари 1,2 миллиард сўмдан ортиқ имтиёзли кредитларни талон-торож қилгани тўғрисида хабар берилган эди.
Изоҳ (0)