Сурхондарё вилояти Термиз шаҳрида фуқаронинг банк картасидаги маблағларни ўғирлаган амалиётчи талабалар аниқланди. Бу ҳақда ИИВ матбуот хизмати хабар берди.
Қайд этилишича, Термиз шаҳри “Тупроққўрғон” маҳалласида яшовчи фуқаро ИИБга мурожаат қилиб, банк картасидан илова орқали 75 миллион 700 минг сўм пулни номаълум шахслар ечиб олганини билдирган.
Сурхондарё вилояти ИИБ Тезкор-қидирув хизмати Киберхавфсизлик бўлими ходимлари томонидан олиб борилган суриштирув ишлари натижасида акциядорлик тижорат банкларидан бирига амалиёт ўташ учун борган икки талаба банкнинг барча сирларини ўрганиб боргани аниқланган.
Талабалар ўзаро келишиб, танишининг номига сим-карта расмийлаштирган ва уларнинг телефонидан фойдаланган ҳолда турли амалиётларни бажариб, ариза муаллифига тегишли пулларни ўғирлаган. Шундан сўнг, улардан бири Термиз шаҳрида жойлашган банкоматлардан бирига шапка, қора кўзойнак, тиббиёт ниқобидан фойдаланган ҳолда бориб, пулларни нақдлаштириб олган.
Гумонланувчилар тезкор ҳаракатлар натижасида қисқа фурсатда аниқланиб, улардан телефон аппаратлари, кўплаб банк карталари ашёвий далил сифатида расмийлаштирилган. Шунингдек, талабалардан бири онасига бериб юборган 59 миллион 800 минг сўм нақд пуллар холислар иштирокида расмийлаштириб олинган.
Ҳолат юзасидан жиноят иши қўзғатилиб, суд органларига юборилган. Суд ҳукмига кўра, улар Жиноят кодексининг 169-моддаси (ўғрилик) 3-қисми билан айбли деб топилиб, бирига 2 йил 3 ой, иккинчисига — 2 йил муддатга озодликдан маҳрум қилиш жазоси тайинланди.
Пластик карталардан пул ўғирлаш ҳолатлари
Апрель ўрталарида Наманганда мактаб ўқувчиси устозининг пластик картасидан 2 миллион сўм ечиб олгани тўғрисида хабар берилганди. 2022 йил июлда эса Андижонда 8-синф ўқувчиси ўнлаб фуқароларнинг пулларини қўлга киритиб, PUBG ўйинига тикиб юборгани аниқланган эди. Июль бошида бўлса, Бухоро вилояти Ғиждувон туманидаги банк филиали кассири мижозларнинг 41 та банк карталаридаги маблағларни ўғирлагани маълум бўлди.
Изоҳ (0)