Қорақалпоғистон Республикаси, Самарқанд ва Тошкент вилоятларида қалбаки акциз маркали алкоголь маҳсулотларини муомалага киритилишига чек қўйилди, деб хабар беради Бош прокуратура ҳузуридаги департамент.
Маълум қилинишича, департамент ҳамда ДХХнинг Булунғур тумани бўлимлари томонидан тезкор тадбирлар ўтказилган. Тадбирлар давомида тумандаги “О.И.” ва “Ш.Ҳ.” МЧЖларга қарашли савдо дўконларида ҳар хил турдаги жами 5 018 дона қалбаки акциз маркали истеъмолга яроқсиз алкоголь маҳсулотлари сотувга қўйилгани аниқланиб, ашёвий далил сифатида олинган.
Департаментнинг Қорақалпоғистон Республикаси бошқармаси ва ЙҲХБ ходимлари ҳамкорлигида ўтказилган тезкор тадбирда Cobalt русумли автотранспорт воситаси тўхтатилиб кўздан кечирилганда, фуқаро У.Қ. қўлбола усулда тайёрланган 666 дона қалбаки акциз маркали алкоголь маҳсулотини Нукус шаҳрида сотиш мақсадида олиб келаётганлиги аниқланган.
Департаментнинг Қибрай туман бўлими, ИИБ ва Солиқ инспекцияси ходимлари ҳамкорлигида ўтказилган тезкор тадбирда тумандаги “О.” МФЙ ҳудудидаги хонадонлардан бирида яшовчи Р.Қ. алкоголь ва тамаки маҳсулотлари савдоси билан шуғулланиб келаётгани аниқланиб, унинг хонадонидан 434 дона қалбаки акциз маркали алкоголь маҳсулоти ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
- Аввалроқ Хоразмда 422 миллион сўмлик акциз маркасиз тамаки маҳсулотлари аниқлангани,
- Навоий ва Бухорода 600 млн сўмлик қалбаки акциз маркали алкоголь маҳсулотлари савдосининг олди олингани тўғрисида хабар берилганди.
Изоҳ (0)