Самарқанд вилоятида ўзгалар номига онлайн кредит расмийлаштирган сохта оператор қўлга олинди, деб хабар беради ИИВ Киберхавфсизлик маркази.
Маълум қилинишича, Самарқанд вилоятида яшовчи У.О. ҳамда Б.Х. исмли аёллар ИИОга мурожаат қилиб, уларнинг номига номаълум сабабларга кўра онлайн кредит расмийлаштирилганини билдирган.
Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида, мазкур жиноятни Иштихон туманида яшовчи, муқаддам судланган 28 ёшли А.Ш. исмли аёл содир этгани аниқланган.
Қайд этилишича, А.Ш. фуқаролар У.О. ва Б.Х.га қўнғироқ қилган ва ўзини “банк оператори” сифатида таништириб, SMS-хабар (сохта ҳавола) юбориш орқали шахсий маълумотларини қўлга киритган. Аёл уларнинг номидан мобил илова орқали рўйхатдан ўтиб, онлайн тарзда 27 миллион сўмдан жами 54 миллион сўм онлайн кредит расмийлаштириб, ўша вақтнинг ўзида мазкур пулларни ўзининг фойдаланувида бўлган банк пластик картасига ўтказиб олган.
Мазкур ҳолат юзасидан Жиноят кодексининг 168-моддаси (фирибгарлик) 3-қисми “б” банди билан жиноят иши қўзғатилиб, А.Ш.нинг содир этилиб, фош этилмай қолган бошқа шу турдаги жиноятларга алоқадорлигини текшириш юзасидан тезкор-суриштирув ишлар олиб борилмоқда.
Бундан олдин Сурхондарё вилоятининг Олтинсой ва Термиз туманларида 11 миллиард сўмдан ортиқ кредит маблағларини ўзлаштирган МЧЖ раҳбарлари аниқланганди. Шунингдек, Сурхондарё ва Фарғонада оилавий корхоналар раҳбарлари 1,2 миллиард сўмдан ортиқ имтиёзли кредитларни талон-торож қилгани тўғрисида хабар берилган эди.
Изоҳ (0)