Toshkentda fuqaroning omonat hisob raqamidagi pullarni yechib olgan shaxslar qo‘lga olindi, deb xabar beradi poytaxt IIBB axborot xizmati.
Qayd etilishicha, fuqaro IIBBga murojaat qilib, omonat hisob raqamida mavjud bo‘lgan 460 million so‘m pul nomaʼlum shaxslar tomonidan yechib olinganini bildirgan.
Murojaat asosida olib borilgan tadbirlar davomida jinoiy guruh aʼzolari jabrlanuvchining shaxsiy maʼlumotlarini qo‘lga kiritgan holda unga tegishli pullarni mobil ilovalar orqali yechib olgani aniqlanib, jinoyatchilar daliliy ashyolar bilan qo‘lga olingan.
Hozirda mazkur shaxslarga nisbatan Jinoyat kodeksining 169-moddasi (o‘g‘irlik) bilan jinoyat ishi qo‘zg‘atilgan. Shuningdek, qo‘lga olingan shaxslarning boshqa jinoyatlarga aloqadorligi tekshirilmoqda.
.jpg)
Toshkent IIBB mazkur fuqarolardan jabr ko‘rganlar bo‘lsa, Toshkent shahar IIBB Axborot texnologiyalar sohasidagi jinoyatlarga qarshi kurashish boshqarmasining telefon raqamiga (71 206 49 44) qo‘ng‘iroq qilib, ariza berishni so‘ramoqda.
Bundan oldin Surxondaryo viloyatining Oltinsoy va Termiz tumanlarida 11 milliard so‘mdan ortiq kredit mablag‘larini o‘zlashtirgan MCHJ rahbarlari aniqlangandi. Shuningdek, Surxondaryo va Farg‘onada oilaviy korxonalar rahbarlari 1,2 milliard so‘mdan ortiq imtiyozli kreditlarni talon-toroj qilgani to‘g‘risida xabar berilgan edi.
Izoh (0)