Ироқ АҚШнинг республикадаги “Катаиб Ҳизбуллоҳ” ва унга алоқадор гуруҳлар объектларига берган зарбасига муносабат билдириб, буни суверенитетга ҳужум деб атади. Бу ҳақда “Газета.ру” хабар берди.
Ироқ бош вазири Муҳаммад ал-Суданий АҚШнинг республика ҳудудидаги “Катаиб Ҳизбуллоҳ” гуруҳи нишонларига зарбалари давлат суверенитетини қўпол равишда бузаётганини айтди. Тегишли муносабат унинг Facebook’даги саҳифасида пайдо бўлди.
“Ироқ ҳукумати 2023 йилнинг 26 декабрида Америка кучлари жавоб чоралари баҳонасида Ироқ ҳарбий объектларига ҳужум қилган воқеани қоралайди”, — дейди Муҳаммад ал-Суданий.
Ал-Суданий Вашингтоннинг ҳаракатларини “душманлик” ва “ноконструктив” деб атади. Унинг сўзларига кўра, бу АҚШ ва Ироқ ўртасидаги муносабатларга путур етказади, шунингдек, Яқин Шарқ давлатининг суверенитетини қўпол равишда бузади.
Аввалроқ Ироқнинг Эрбил шаҳрида “Катаиб Ҳизбуллоҳ” вакиллари халқаро коалиция кучларига ҳужум уюштиргани, натижада бир неча киши жароҳатлангани хабар қилинганди.
Пентагон маълумотларига кўра, 17 октябрдан бери Сурия ва Ироқдаги АҚШ қўшинларига 66 марта ҳужум қилинган. Сурия ҳудудида 900 га яқин, Ироқда эса 2,5 минг америкалик аскар бор. Ливаннинг “Ҳизбуллоҳ” шиа партияси бош котиби ўринбосари Наим Қосимнинг айтишича, Сурия ва Ироқдаги Америка ҳарбий базаларига ҳужумлар Исроилнинг Ғазо секторидаги амалиётини тўхтатиш учун жуда муҳим.
Изоҳ (0)