АҚШ ҳукумати Ироқ пойтахти Бағдоддаги Америка элчихонасига уюштирилган ҳужумни қоралади ва воқеа юзасидан тергов ўтказишга чақирди. Бу ҳақда АҚШ давлат департаменти сайтида айтилади.
Вашингтон воқеада Теҳронни айблади.
“Ироқда эркин фаолият юритаётган Эронга алоқадор кўплаб жангарилар Ироқ хавфсизлиги ва барқарорлигига, бизнинг ходимларимизга ва минтақадаги ҳамкорларимизга таҳдид солмоқда. Ироқ бош вазири Муҳаммад Шиа ас-Суданий бу ҳужумларни теракт деб атаганда ҳақ эди”, — дейилади департамент баёнотида.
Исроил ва ҲАМАС ўртасида уруш бошланганидан кейин Ироқ ва Суриядаги Америка ҳарбий базаларига тез-тез ҳужумлар кузатилмоқда. 9 ноябрь куни Ироқ Курдистонидаги америкалик ҳарбийлар жойлашган авиабазага иккита камикадзе дронлари ҳужум қилди. Кейинроқ, 3 декабрь куни Аl Mayadeen ва Al Hadath Erbil аэропортидаги АҚШ ҳарбий базасига учувчисиз учоқ зарбаси берилгани ҳақида хабар қилинди. Вашингтон Исроилни қўллаб-қувватлашини бир неча бор таъкидлаган.
1 декабрь куни АҚШ давлат котиби Энтони Блинкен ал-Суданий билан музокаралар олиб борди ва Ироқ АҚШ ҳарбий базаларини ҳимоя қилиш ҳамда уларга ҳужум қилганларни таъқиб қилиш бўйича ўз мажбуриятларини бажариши кераклигини айтди.
8 декабрь куни эрталаб Бағдоддаги АҚШ элчихонаси жойлашган ҳудуд ракеталардан ўққа тутилди. Дипломатик миссия яқинида портлаш овозлари эшитилди, бинонинг ўзида огоҳлантирувчи сигнал янгради.
Изоҳ (0)