Андижон, Наманган ва Сурхондарё вилоятларида табиий газ ҳамда электр тармоқларига ноқонуний уланиш ҳолатлари фош этилди, деб хабар беради Бош прокуратура ҳузуридаги департамент.
Маълум қилинишича, департаментнинг Булоқбоши туман бўлими томонидан туман газ таъминоти бўлими ходимлари билан ҳамкорликда тезкор тадбир ўтказилган. Тадбирда фуқаролар У.Д. ва Н.К. “Б.” МФЙ ҳудудидаги иссиқхонани ҳеч қандай ҳужжатсиз тижорат мақсадида умумий фойдаланишдаги газ тармоғига ўғрилик йўли билан улаб, 321,5 минг куб табиий газдан ноқонуний фойдаланганликлари оқибатида давлат ва жамият манфаатларига 482,3 миллион сўм зарар етказилгани аниқланган.
Шу каби, департаментнинг Янги Наманган туман бўлими томонидан ўтказилган терговга қадар текширувда фуқаро Э.А. ўзига тегишли савдо дўконида ҳеч қандай ҳужжатсиз умумий фойдаланишдаги электр тармоғига тижорат мақсадида ўзбошимчалик билан уланиб, жами 311,8 миллион сўмлик электр энергиясидан ноқонуний фойдалангани маълум бўлган.
Департаментнинг Шўрчи туман бўлими томонидан ЭТК ходимлари билан ҳамкорликда ўтказилган терговга қадар текширувда “Т.Т.” МЧЖ масъул шахслари тош майдаловчи ускунасининг электр ҳисоблагич тамғасини бузиб, жами 122,3 миллион сўмлик электр энергиясидан ноқонуний фойдалангани аниқланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)