Андижон вилоятидаги заправкада сиқилган газни қиммат нархда сотган АГҚШ фаолияти тўхтатилди. Бу ҳақда Электр энергияси, нефть маҳсулотлари ва газдан фойдаланишни назорат қилиш инспекцияси хабар берди.
Қайд этилишича, 20 октябрь куни Жалақудуқ туманидаги “Мезон авто ойл” МЧЖга қарашли автомобилларга газ тўлдириш компрессор шохобчасида 1 метр куб сиқилган газни 3600 сўмдан сотилаётгани истеъмолчилар томонидан эътирозларга сабаб бўлган.
Ушбу ҳолатга аниқлик киритиш мақсадида “Ўзэнергоинспекция” Андижон ҳудудий бошқармаси томонидан ўрганиш ўтказилган. Унга кўра Вазирлар Маҳкамасининг 2023 йил 15 сентябрдаги 475-сонли қарори талаблари юзасидан огоҳлантириш берилишига қарамасдан, мазкур шохобча 1 метр куб сиқилган газни 3600 сўмдан сотилаётгани аниқланган.
Ушбу қоидабузарлик юзасидан ҳужжатлар расмийлаштирилди ҳамда мазкур шохобча газ тармоғидан ажратилиб, унинг фаолияти вақтинча тўхтатилган.
Сентябрь ўрталарида Ўзбекистонда ёқилғи-энергетика ресурсларининг янги тарифлари тасдиқланган эди. Қарор билан автомобилларга газ тўлдириш компрессор шохобчаларида табиий газни сотишда унинг энг баланд чакана нархи келгуси олти ойда бир куб метр учун 3250 сўмдан ошиб кетмаслиги белгиланган.
Изоҳ (0)