Хоразмда оилавий болалар уйи раҳбари уч нафар вояга етмаган тарбияланувчини 10 ой давомида вилоят адлия бошқармаси ва туман фавқулодда вазиятлар бўлими бошлиқлари билан жинсий алоқада бўлишга мажбурлагани ҳолати бўйича жиноят иши Тошкент шаҳар судида кўриб чиқилди.
Бугун, 3 ноябрь куни Жиноят ишлари бўйича Тошкент шаҳар суди аппеляция ҳайъатида мазкур жиноят иши бўйича суд ҳукми ўқилди. Бу ҳақда Инсон ҳуқуқлар “Эзгулик” жамияти раиси Абдураҳмон Ташанов маълум қилди.
Абдураҳмон Ташановнинг айтишича, хоразмлик педофиллар суд залидан қамоққа олинган.
Хоразм вилояти Адлия бошқармаси собиқ раҳбари Ойбек Машарипов 3 йилга ва Янгиариқ тумани ФВВ собиқ бошлиғи Анвар Курязов 2 йилга озодликдан маҳрум қилинган.
Ҳолат юзасидан Олий Суд ахборот хизмати маълумот берди. Унда айтилишича, Тошкент шаҳар суди жиноят ишлари бўйича апелляция инстанциясининг 2023 йил 3 ноябрдаги ҳукми билан жиноят ишлари бўйича Хива туман судининг 2022 йил 6 сентябрдаги ҳукмининг А.М. ва А Қ.га оид қисми бекор қилинган.
“Судланувчилар А.М. ва А.Қ. Жиноят кодексининг олдинги таҳрирдаги 128-моддаси (ўн олти ёшга тўлмаган шахс билан жинсий алоқа қилиш) 1-қисми ва 128-1-моддаси (ўн олти ёшдан ўн саккиз ёшгача бўлган шахсга моддий қимматликлар бериш ёхуд уни мулкий манфаатдор этиш орқали у билан жинсий алоқа қилиш) да назарда тутилган жиноятларни содир этганликда айбли деб топилди ва Жиноят кодексининг 59-моддаси (бир неча жиноят содир этганлик учун жазо тайинлаш) тартибида уларнинг ҳар бирига узил-кесил 3 йил муддатга озодликдан маҳрум қилиш жазоси тайинланди.
Шу тариқа судланувчиларга нисбатан қўлланилган “гаров” тарзидаги эҳтиёт чораси бекор қилиниб, А.М. ва А.Қ. суд залидан қамоққа олинди”, — дейилади маҳкама ахборотида.
Хоразмда меҳрибонлик уйи қизлари зўрлангани иши
Зўравонликка қарши курашувчи “Немолчи.уз” лойиҳаси Хоразм вилоятида 3 нафар меҳрибонлик уйи тарбияланувчиси 10 ой давомида вилоят Адлия бошқармаси бошлиғи ва туман фавқулодда вазиятлар бўлими бошлиғи томонидан зўрлаб келинганини хабар қилганди. Жиноят ишлари бўйича Хива туман судининг 2022 йил 6 сентябрдаги ҳукмига кўра, меҳрибонлик уйи мудирасига 5 йил-у 6 ойга озодликдан маҳрум қилиш жазоси тайинланган. Ёш болалар билан жинсий алоқада бўлган икки масъулга эса 1,5 йилга озодликни чеклаш жазоси белгиланган.
Судланган А.М. ва А.К.га енгил жазо тайинлангани ва бошқа ҳолатлар юзасидан 29 март куни Олий суд жиноят ишлари бўйича судлов ҳайъати кассация инстанцияси судига протест келтирилган. 6 апрель куни иш Олий судда кўриб чиқилиб, ҳукмнинг А.М. ва А.К.га оид қисми бекор қилинган ҳамда апелляция инстанциясида қайта кўриб чиқиш учун Тошкент шаҳар судига юборилганди.
Июль ойида Хоразмда меҳрибонлик уйи қизлари зўрлангани бўйича жиноят ишини кўриш 1 ойлик муддатга тўхтатилганди.
Унда Тошкент шаҳар суди апелляция инстанциясининг суд мажлисида прокурор судга илтимоснома билан мурожаат қилиб, Жиноят-процессуал кодексининг 416-417-моддалари тартибида судланувчиларга янги айблов бўйича жиноят иши қўзғатиш ва бошқа шахсларни жиноий жавобгарликка тортиш масаласини ҳал қилиш учун жиноят иши ҳужжатларини айблов хулосасини тасдиқлаган прокурорга юбориш тўғрисида ажрим чиқаришни сўраганди.
Апелляция инстанция судлов ҳайъати прокурор илтимосномасини қаноатлантириб, судланувчилар А.М. ва А.К.га оид жиноят иши бўйича ажрим қабул қилиб, Хоразм вилоят прокурорининг ўринбосарига юборилди ва жиноят ишини кўриш 1 ойлик муддатга тўхтатилган.
Мазкур жиноят иши ёпиқ суд мажлисида кўриб чиқилган.
Изоҳ (0)