Xorazmda oilaviy bolalar uyi rahbari uch nafar voyaga yetmagan tarbiyalanuvchini 10 oy davomida viloyat adliya boshqarmasi va tuman favqulodda vaziyatlar bo‘limi boshliqlari bilan jinsiy aloqada bo‘lishga majburlagani haqida xabar berilgandi. Oliy sud matbuot xizmatining maʼlum qilishicha, ayblanuvchilarga nisbatan jinoyat ishi Toshkent shahar sudida ko‘rib chiqiladi.
Xabarga ko‘ra, Oliy sud jinoyat ishlari bo‘yicha sudlov hayʼati kassatsiya instansiyasining 6-apreldagi ajrimi bilan Xorazm viloyat sudi jinoyat ishlari bo‘yicha sudlov hayʼati appelyatsiya instansiyasining 2022-yil 27-dekabrdagi ajrimining A.M. va A.Q.ga oid qismini bekor qilgan. Ishni yangidan appelyatsiya instansiyasi sudida ko‘rish uchun yuborish to‘g‘risidagi Xorazm viloyat prokuraturasining kassatsiya tartibidagi protesti qanoatlantirilgan. Ushbu jinoyat ishi yangidan appelyatsiya instansiya sudida ko‘rish uchun yuborilishi belgilangan.
Jinoyat-protsessual kodeksining 393-moddasiga (jinoyat ishining sudlovga tegishliligiga ko‘ra o‘tkazilishi) asosan ushbu jinoyat ishi appelyatsiya tartibida yangidan ko‘rib chiqish uchun Toshkent shahar sudiga yuborilgani maʼlum qilindi.
Qayd etilishicha, Jinoyat-protsessual kodeksining 19-moddasi (sudda jinoyat ishlarining oshkora ko‘rilishi) talablariga muvofiq, mazkur jinoyat ishi yopiq sud majlisida ko‘rib chiqilib, qo‘shimcha maʼlumot sud jarayoni yakuni bo‘yicha beriladi.
Avvalroq ushbu holat yuzasidan munosabat bildirgan Prezident administratsiyasi sho‘ba mudiri Saida Mirziyoyeva qonunchilikda jiddiy muammolar borligi va ushbu bo‘shliqdan jirkanch shaxslar foydalanib qolayotganini alohida qayd etib, Bosh prokuraturadan mazkur holatga alohida e’tibor qaratib, sinchiklab o‘rganishni va huquqiy baho berishni so‘ragandi.
Prezident administratsiyasi rahbari o‘rinbosari Komil Allamjonov pedofillarga nisbatan kimyoviy kastratsiya jazosini qo‘llash yuzasidan qonunchilikka o‘zgartirish kiritish vaqti kelganini aytgandi.
Bolalar ombudsmani ham mehribonlik uyi qizlariga nisbatan qo‘llanadigan har qanday jinsiy jinoyatlarga og‘ir jazo turlarini qo‘llash kerak, degan pozitsiyada.
Izoh (0)