Xorazmda oilaviy bolalar uyi rahbari uch nafar voyaga yetmagan tarbiyalanuvchini 10 oy davomida viloyat adliya boshqarmasi va tuman favqulodda vaziyatlar bo‘limi boshliqlari bilan jinsiy aloqada bo‘lishga majburlagani holati bo‘yicha jinoyat ishi Toshkent shahar sudida ko‘rib chiqildi.
Bugun, 3-noyabr kuni Jinoyat ishlari bo‘yicha Toshkent shahar sudi appelyatsiya hayʼatida mazkur jinoyat ishi bo‘yicha sud hukmi o‘qildi. Bu haqda Inson huquqlar “Ezgulik” jamiyati raisi Abdurahmon Tashanov maʼlum qildi.
Abdurahmon Tashanovning aytishicha, xorazmlik pedofillar sud zalidan qamoqqa olingan.
Xorazm viloyati Adliya boshqarmasi sobiq rahbari Oybek Masharipov 3 yilga va Yangiariq tumani FVV sobiq boshlig‘i Anvar Kuryazov 2 yilga ozodlikdan mahrum qilingan.
Holat yuzasidan Oliy Sud axborot xizmati ma‘lumot berdi. Unda aytilishicha, Toshkent shahar sudi jinoyat ishlari bo‘yicha apellyatsiya instansiyasining 2023-yil 3-noyabrdagi hukmi bilan jinoyat ishlari bo‘yicha Xiva tuman sudining 2022-yil 6-sentyabrdagi hukmining A.M. va A Q.ga oid qismi bekor qilingan.
“Sudlanuvchilar A.M. va A.Q. Jinoyat kodeksining oldingi tahrirdagi 128-moddasi (o‘n olti yoshga to‘lmagan shaxs bilan jinsiy aloqa qilish) 1-qismi va 128-1-moddasi (o‘n olti yoshdan o‘n sakkiz yoshgacha bo‘lgan shaxsga moddiy qimmatliklar berish yoxud uni mulkiy manfaatdor etish orqali u bilan jinsiy aloqa qilish) da nazarda tutilgan jinoyatlarni sodir etganlikda aybli deb topildi va Jinoyat kodeksining 59-moddasi (bir necha jinoyat sodir etganlik uchun jazo tayinlash) tartibida ularning har biriga uzil-kesil 3 yil muddatga ozodlikdan mahrum qilish jazosi tayinlandi.
Shu tariqa sudlanuvchilarga nisbatan qo‘llanilgan “garov” tarzidagi ehtiyot chorasi bekor qilinib, A.M. va A.Q. sud zalidan qamoqqa olindi”, — deyiladi mahkama axborotida.
Xorazmda mehribonlik uyi qizlari zo‘rlangani ishi
Zo‘ravonlikka qarshi kurashuvchi “Nemolchi.uz” loyihasi Xorazm viloyatida 3 nafar mehribonlik uyi tarbiyalanuvchisi 10 oy davomida viloyat Adliya boshqarmasi boshlig‘i va tuman favqulodda vaziyatlar bo‘limi boshlig‘i tomonidan zo‘rlab kelinganini xabar qilgandi. Jinoyat ishlari bo‘yicha Xiva tuman sudining 2022-yil 6-sentyabrdagi hukmiga ko‘ra, mehribonlik uyi mudirasiga 5 yil-u 6 oyga ozodlikdan mahrum qilish jazosi tayinlangan. Yosh bolalar bilan jinsiy aloqada bo‘lgan ikki mas’ulga esa 1,5 yilga ozodlikni cheklash jazosi belgilangan.
Sudlangan A.M. va A.K.ga yengil jazo tayinlangani va boshqa holatlar yuzasidan 29-mart kuni Oliy sud jinoyat ishlari bo‘yicha sudlov hayʼati kassatsiya instansiyasi sudiga protest keltirilgan. 6-aprel kuni ish Oliy sudda ko‘rib chiqilib, hukmning A.M. va A.K.ga oid qismi bekor qilingan hamda apellyatsiya instansiyasida qayta ko‘rib chiqish uchun Toshkent shahar sudiga yuborilgandi.
Iyul oyida Xorazmda mehribonlik uyi qizlari zo‘rlangani bo‘yicha jinoyat ishini ko‘rish 1 oylik muddatga to‘xtatilgandi.
Unda Toshkent shahar sudi apellyatsiya instansiyasining sud majlisida prokuror sudga iltimosnoma bilan murojaat qilib, Jinoyat-protsessual kodeksining 416-417-moddalari tartibida sudlanuvchilarga yangi ayblov bo‘yicha jinoyat ishi qo‘zg‘atish va boshqa shaxslarni jinoiy javobgarlikka tortish masalasini hal qilish uchun jinoyat ishi hujjatlarini ayblov xulosasini tasdiqlagan prokurorga yuborish to‘g‘risida ajrim chiqarishni so‘ragandi.
Apellyatsiya instansiya sudlov hay’ati prokuror iltimosnomasini qanoatlantirib, sudlanuvchilar A.M. va A.K.ga oid jinoyat ishi bo‘yicha ajrim qabul qilib, Xorazm viloyat prokurorining o‘rinbosariga yuborildi va jinoyat ishini ko‘rish 1 oylik muddatga to‘xtatilgan.
Mazkur jinoyat ishi yopiq sud majlisida ko‘rib chiqilgan.
Izoh (0)