Олий Мажлис Қонунчилик палатасида 28 февраль куни бўлиб ўтган йиғилишда “Юксалиш” умуммиллий ҳаракати раиси Бобур Бекмуродов педофилларга қарши жазо чораларини кучайтиришни таклиф қилди.
Унинг таъкидлашича, ҳали ҳам қонунчиликда педофилияга нисбатан қўлланиладиган жазолар етарли эмас. Масалан, 20 ёшли йигит педофилияга оид жиноятни содир этиб, 15 йил қамалса, у 35 ёшида яна жамиятга қайта кириб келади.
“Жаҳон тажрибасида бунга қарши кенг комплекс чоралар кўрилади. Бу кимёвий ва жинсий бичиш амалиёти, таълим муассасалари атрофида 10 км рadiusда истиқомат қилмаслик ёки педофилларнинг очиқ рўйхатларини эълон қилиш масалаларини қонунчиликка киритиш керак. Ички ишлар вазирлиги уларнинг рўйхатини доимо очиқ тарзда эълон қилиб бориши керак. Буни нега айтяпман, исталган жиноятга жамиятга унча эътибор бермаслиги мумкин, оддий ҳол деб қабул қилиниши мумкин. Бизнинг жамиятда бола олий қадрият сифатида қаралади. Шунинг учун болага нисбатан зўравонлик бўлса, жиноят бўлса, халқ ларзага келади. Мана шу нуқтаи назардан, қонуннинг тегишли қисмини янада кучайтиришимиз керак”, — дейди Бобур Бекмуродов.
Эслатиб ўтамиз, Янгиҳаёт туманида зўрлик ва қотиллик аломатлари билан 12 ёшли қизнинг мурдаси топилганди. Мазкур ҳолат юзасидан жиноят иши қўзғатилган. Жиноят иши бўйича гумонланувчи шахс (29 ёшли эркак) Жиноят-процессуал кодексининг 221-моддаси тартибида ушланган.
Шундан сўнг Тошкент шаҳри Оила ва хотин-қизлар бошқармаси мактаб ўқувчиларининг ота-оналарига мурожаат қилганди. Таъкидланишича, ота-оналар фарзандларига ўзи ҳамроҳлик қилиши ва мактабга олиб бориб мактабдан олиб кетиши керак. Улар билан доимо алоқада бўлиб туриш лозим.
Изоҳ (0)