Xorazmda oilaviy bolalar uyi rahbari uch nafar voyaga yetmagan tarbiyalanuvchini 10 oy davomida viloyat adliya boshqarmasi va tuman favqulodda vaziyatlar bo‘limi boshliqlari bilan jinsiy aloqada bo‘lishga majburlagani haqida xabar berilgandi.
Oliy sud mehribonlik uyidagi voyaga yetmagan qizlar bilan jinsiy aloqada bo‘lgan amaldorlar ishi yuzasidan protest yoki shikoyat olmaganini ma’lum qildi. Jinoyat ishlari bo‘yicha Xiva tuman sudining 2022-yil 6-sentabrdagi hukmiga ko‘ra:
Y.X. (1979-yilda Urganch shahrida tug‘ilgan, Xorazm viloyati Xalq ta’lim boshqarmasiga qarashli Urganch shahridagi 1-sonli oilaviy bolalar uyi rahbari bo‘lgan) Jinoyat kodeksining 135-moddasi (odam savdosi) 3-qismi “a” bandi, 167-moddasi (o‘zlashtirish yoki rastrata yo‘li bilan talon-toroj qilish) 2-qismi “g” bandi va 209-moddasi (mansab soxtakorligi) 1-qismida nazarda tutilgan jinoyatlarni sodir qilganlikda aybli deb topilib, unga 1 yilga muayyan huquqdan, ya’ni davlat ishtirokidagi korxona, tashkilot, muassasalarda mansabdorlik va moddiy javobgarlik bilan bog‘liq vazifalarda ishlash huquqidan mahrum qilgan holda 5 yil 6 oy muddatga ozodlikdan mahrum qilish jazosi tayinlangan.
A.M. (1979-yilda Nukus shahrida tug‘ilgan, Xorazm viloyati Adliya boshqarmasi boshlig‘i lavozimida ishlagan) va A.Q. (1984-yilda Yangiariq tumanida tug‘ilgan, Yangiariq tumani Favqulodda vaziyatlar bo‘limi boshlig‘i lavozimida ishlagan) Jinoyat kodeksining 128-moddasi (o‘n olti yoshga to‘lmagan shaxs bilan jinsiy aloqa qilish) 1-qismi va Jinoyat kodeksining eski tahrirdagi 128-1-moddasi (o‘n olti yoshdan o‘n sakkiz yoshgacha bo‘lgan shaxs bilan moddiy qimmatliklar berish yoxud mulkiy manfaatdor etish orqali jinsiy aloqa qilish)da nazarda tutilgan jinoyatlarni sodir qilganlikda aybli deb topilib, ularning har biriga 1 yil 6 oy muddatga ozodlikni cheklash jazosi tayinlangan.
A.M. va A.Q.ning himoyachisi hamda Y.X. tomonidan kiritilgan apellyatsiya shikoyatlariga asosan ushbu jinoyat ishi apellyatsiya tartibida ko‘rib chiqilib, Xorazm viloyat sudi jinoyat ishlari bo‘yicha sudlov hay’ati apellyatsiya instansiyasining 2022-yil 27-dekabrdagi ajrimiga ko‘ra jinoyat ishlari bo‘yicha Xiva tuman sudining 2022-yil 6-sentabrdagi hukmi bilan sudlanuvchilarga nisbatan tayinlangan jazo o‘zgarishsiz qoldirilgan.
Taraflarga apellyatsiya instansiyasi sudining ajrimi ustidan Oliy sudning jinoyat ishlari bo‘yicha sudlov hay’atiga kassasiya tartibida shikoyat qilishi, prokuror protest keltirishi mumkinligi tushuntirilgan bo‘lib, hozirgi kunga Oliy sudga kassatsiya tartibida protest yoki shikoyat kelib tushmagan. Ushbu jinoyat ishi Oliy sud jinoyat ishlari bo‘yicha sudlov hay’atida kassatsiya tartibida ko‘rilgandagina yuqoridagi sud qarorining qonuniyligi, adolatliligi va asosliligiga huquqiy baho berilishi ma’lum qilingan.
Izoh (4)
Bu norasida qizlarni ota onasi yo'qligi uchun zo'rlash kerakmi..? Yoki qizlarni tarafini yonini oladigan yaqilari bo'lmagani uchun mansabidan foydalani nafsiga qul bo'lib ko'ngliga kelgan ishni qilobdimi umurbotga maxkum qilish kerak yoki o'zimi samo sud qilamiz biz o'sha norasida qizlarni og'alari akalari bo'lamiz ....
18 yoshga toʻlmagan qizlar trgajolik bu ogir jinoyatku bunga befarq boʻlmaslik kerak.shunchaki zoʻrlash deganiga koʻz yumib ketilmaydiku
Bu narsaga shunchalik past nazarda qaralganiga xayronman shinchalikka xam boriladimi 3 nafar qizni taqdiri xal boʻlib turganda bu vallomatga arzimagan qamoq jazosi berilgan.kamida 15 yil berilish k.k shunda tovbasiga tayanadi.
Ming lanat boʻlsin pedofillarga