Европа кенгаши президенти Шарль Мишель БМТ Бош Ассамблеясининг 78-сессияси доирасида Нью-Йоркда Туркманистон президенти Сердар Бердимуҳамедов билан учрашди.
“Кейинги йилги Марказий Осиё саммитигача барча соҳаларда мулоқотимизни фаоллаштириш ва икки томонлама муносабатларимизни чуқурлаштиришга йўл очиш зарурлигини муҳокама қилдик”, — деб ёзди Мишель Twitter’да.
 _ X.png)
“Туркман давлат хабарлари” агентлигининг хабар беришича, Бердимуҳамедов Ашхобод Европа Иттифоқи билан конструктив мулоқотни мустаҳкамлашга катта аҳамият беришини таъкидлаган. Европанинг етакчи компаниялари Туркманистон иқтисодиётининг кўплаб тармоқларида – нефть-газ комплекси, транспорт, электр энергетикаси, қурилиш ва алоқа соҳаларида ҳамкорлик қилмоқда.
Мутахассисларнинг “Дарё”га маълум қилишича, 2008 йилда Европа Иттифоқи ва Туркманистон ўртасида энергетика соҳасида ҳамкорлик меморандуми имзоланган. Европа туркман газини Каспий денгизи, Озарбайжон ва Туркия орқали олишга умид қилмоқда. Бердимуҳамедов бу йил Европа Иттифоқининг Брюсселдаги бош қароргоҳига ташриф буюриши режалаштирилган.
Яқинда Европарламент делегацияси Ашхободга ташриф буюрди. Туркманистон билан 1998 йилда имзоланган Шериклик ва ҳамкорлик шартномасини ратификация қилиш масаласи кўриб чиқилди.
Ҳозирги вақтда икки томонлама алоқалар Муваққат савдо битими билан тартибга солинади. Туркманистоннинг Европа Иттифоқи мамлакатлари билан ўзаро савдоси 2023 йилнинг январь—май ойларида 494,66 миллион еврони ташкил этди, бу ўтган йилга нисбатан 17,8 фоизга кўп.
Изоҳ (0)