Туркманистон парламенти раҳбари Гурбангули Бердимуҳамедов Марказий Осиё давлатлари раҳбарларининг олий мукофоти билан тақдирланди. Бу ҳақда Sputnik Тожикистон хабар берди.
Марказий Осиё давлатлари раҳбарлари томонидан қабул қилинган қарор Бердимуҳамедовнинг минтақа давлатлари ўртасида дўстлик, ҳамкорликни мустаҳкамлаш ва тинчликни сақлашга қўшган улкан ҳиссаси эътироф этилганидан далолат беради.
Марказий Осиё ва Озарбайжон президентлари иштирокида Бердимуҳамедовга “Фахрий нишон” орденини топшириш маросими бўлиб ўтган. Бердимуҳамедовга мукофотни Тожикистон президенти Эмомали Раҳмон топширган.
Таъкидланишича, Бердимуҳамедов минтақа мамлакатлари ўртасида сиёсий, савдо-иқтисодий ва маданий-гуманитар соҳаларда ўзаро манфаатли ҳамкорликни мустаҳкамлаш, минтақа давлатларининг умумий манфаатлари ва ташаббусларини дунёда илгари суришга катта ҳисса қўшган.
Туркманистон Халқ Маслаҳати раиси Гурбангули Бердимуҳамедов олий фахрий мукофотни қўлга киритгач, Эмомали Раҳмонга меҳмондўстлиги, хизматларини эътироф этгани учун Марказий Осиё давлатлари раҳбарларига миннатдорлик билдирган.
Эслатиб ўтамиз, Бердимуҳамедов 2006 йилдан 2022 йилгача Туркманистон президенти лавозимида ишлаган.
Изоҳ (0)