Қорақум чўлида Туркманистоннинг табиий Гарашор пасттекислигида суғориладиган ерларнинг мелиоратив ҳолатини яхшилаш, тупроқ шўрланишининг олдини олиш имконини берувчи “Олтин аср” кўли яратилмоқда.
Туркманистон Атроф-муҳитни муҳофаза қилиш вазирлигининг “Дарё”га маълум қилишича, буларнинг барчаси экологияга ижобий таъсир кўрсатади.
“Гап шундаки, республиканинг Марям, Ахал ва Болқон вилоятларида ҳосил бўлган коллектор-дренаж оқимлари авваллари Қорақум қумлари пасттекисликларида тўпланиб, яйловларни сув босган.
Режага кўра, дренаж коллектори орқали сув етказиб бериладиган янги сув омборининг умумий сиғими 132 миллиард куб метрни, сув юзаси майдони эса икки минг квадрат километрга яқинни ташкил қилади”, — дейди вазирлик.
Бир неча миллиард долларга баҳоланаётган гидротехника лойиҳасининг биринчи босқичи 2009 йилда фойдаланишга топширилганди.
Айни босқичда кўл атрофидаги ҳудудни ривожлантириш концепцияси доирасида кирувчи сувни тузсизлантириш технологияларини жорий этиш бўйича ишлар олиб борилмоқда. Бу балиқчилик, қўшни ҳудудларда туячиликни ривожлантириш имконини беради.
Азиз Бояров
Изоҳ (0)