Навоий вилоятининг Қизилтепа туманида сохта пул тайёрлаш ва ўтказишда гумонланаётган бир гуруҳ шахслар қўлга олинди. Бу ҳақда вилоят ИИБ ахборот хизмати хабар берди.
Маълум қилинишича, Қизилтепа туманида истиқомат қилаётган асли бухоролик 30 ёшли Аслиддин (исмлари ўзгартирилган) компьютер технологияси соҳасидаги билимларини қалбаки пуллар ишлаб чиқаришга йўналтирган.
Жиноий тўдада бири пулларни ишлаб чиқариш, бири муомалага киритиш яна бири ёрдамчи ва ҳайдовчилик қилишни бўйнига олган. Улар 200 минг сўмлик купюрада жами 400 миллион сўм пулларни тайёрлашга муваффақ бўлган.
Навоий вилояти ИИБ ТҚХ ЖҚБ, ДХХ Навоий вилояти бошқармаси ва департамент ходимлари билан ҳамкорликда ўтказилган тезкор тадбирда жиноий гуруҳ томонидан 400 миллион сўм сохта пуллар 160 миллион сўм ҳақиқий пулларга алмаштирилаётган пайтда қўлга олинган.
Ҳозирда уларга нисбатан Жиноят кодексининг 176-моддаси 3-қисми билан жиноят иши қўзғатилиб, тергов ҳаракатлари олиб борилмоқда.
Қалбаки пуллар муомаласи
Апрель бошларида Тошкент шаҳри Янгиҳаёт туманида харидор қалбаки пулга iPhone сотиб олгани, Тошкент вилояти Ангрен шаҳрида қалбаки пуллар муомалага киритилишининг олди олингани тўғрисида хабар берилганди.
2022 йил ноябрида Наманган вилоятида қалбаки 8 300 долларни муомалага киритишга уринган шахс ушланган эди. Декабрда эса Наманганда МИБ идорасида қалбаки 10 000 доллар ёқиб юборилган.
Изоҳ (0)