Миллий гвардия ҳарбий хизматчиси томонидан Тошкент шаҳрида патрул-пост хизмати ходимининг қонуний талабларига бўйсунмасдан фаол қаршилик кўрсатган шахс қўлга олинди. Бу ҳақда Миллий гвардия матбуот хизмати хабар берди.
Қайд этилишича, Тошкент шаҳар ИИББ патрул-пост хизмати ходими Х. 5 август куни Қўйлиқ бозорида спиртли ичимлик истеъмол қилиб, маст ҳолатда скутерда бозор бўйлаб ҳаракатланаётган фуқарони тўхтатган. Фуқаро эса патрул-пост хизмати ходимининг қонуний талабига агрессив муносабатда бўлиб, ёнида бўлган “отвёртка” билан ҳуқуқ-тартибот ходимининг бел соҳасига уриб, воқеа жойидан яширинган.
Қўйлиқ бозори ҳудудида жамоат тартибини таъминлашга масъул бўлган Миллий гвардия ҳарбий хизматчиси воқеадан хабар топиб, дарҳол ушбу шахсни қўлга олиш чораларини кўрган.
Бир неча дақиқадан сўнг, Миллий гвардия ҳарбий хизматчиси гумонланувчи фуқарога етиб олиб, уни қўл жанги услуби билан қуролсизлантирган ҳолда қўлга олган ва Бектемир туманининг 4-сонли ички ишлар бўлимига олиб бориб топширган.
Олиб борилган дастлабки суриштирув давомида ушбу шахс Самарқанд вилоятида туғилган 47 ёшли фуқаро А.Р. экани, илгари оғир ва ўта оғир жиноят содир этгани учун бир неча бор жиноий жавобгарликка тортилгани ва 2016 йилда озодликка чиққанлиги маълум бўлган.
Ушбу ҳолат бўйича ички ишлар органлари томонидан Жиноят кодексининг 277-моддаси 3-қисми (безорилик) бўйича жиноий иш қўзғатилган. Фуқаро А.Р. гумонланувчи сифатида процессуал тарзда ҳибсга олинган.
“Жабрланган ходим ҳозирда шифохонада, шифокорлар унинг аҳволини қониқарли деб баҳоламоқда”, — дейилади хабарда.
Июль бошларида Тошкент вилояти ҳудудида фуқаро ИИБ ходимларига пичоқ ўқталгани тасвирланган видео тарқалганди. Тошкент вилояти Ички ишлар бош бошқармасининг мазкур воқеа юзасидан тушунтириш беришича, у ИИБ ходимига пичоқ ўқталишидан аввал 40 ёшли фуқаронинг қорин соҳасига пичоқ санчиб, унга тан жароҳати етказган.
Изоҳ (0)