Украина президенти Владимир Зеленский SCALP ракеталарини олганини маълум қилди. Франция президенти Эмманюэль Макрон июль ойида бундай ракеталарни Украинага топшириш қарорини эълон қилган бўлса, Қуролли кучлар вазири Себастьян Лекорню снарядларнинг бир қисми Украинага етказилганини маълум қилган эди.
SCALP-EG ракетаси Украина армияси томонидан аллақачон қўлланаётган Британиянинг Storm Shadow ракетасининг французча версиясидир. Ракетанинг учиш тезлиги 1000 км/соатдан ошади. 500 км гача бўлган масофадаги нишонларни уриш имкониятига эга.
Украина Қуролли кучлари куни муносабати билан Зеленскийнинг ижтимоий тармоқлардаги саҳифаларида видео пайдо бўлди. Унда давлат раҳбари Patriot ва IRIS-Т ҳаво ҳужумидан мудофаа тизимларининг фаолияти тўғрисидаги ҳисоботни тинглаётгани, Су-25, Су-24М, Су-27, МиГ-29 самолётларини кўздан кечираётгани акс этган.
Зеленскийга самолётлар иттифоқчилар томонидан етказиб берилаётган қуролларга мослаб модернизация қилингани ҳақида маълум қилинди. Бунга Storm Shadow узоқ масофага учадиган ракеталар ва АGM HАRМ радиолокацияга қарши ракеталар киради.
Россия Федерацияси президенти матбуот котиби Дмитрий Песков Франциянинг ракеталар етказиб бериш ҳақидаги қарорини хато деб атади. Унинг сўзларига кўра, бу “Украина томони учун салбий оқибатларга олиб келиши мумкин”.
Изоҳ (0)