Украина президенти Владимир Зеленский кузда “тинчлик саммити” ўтказишга чақирди. У бу ҳафта Саудия Арабистонида бўлиб ўтадиган музокаралар мазкур саммитга йўл очишини айтди.
Зеленский 5 ва 6 август кунлари Жиддада бўлиб ўтадиган йиғилишда қатнашади. Унда 40 га яқин давлат вакиллари иштирок этади, бироқ Россиядан вакиллар таклиф этилмаган.
“Биз саммитни шу йилнинг кузида ўтказиш учун ҳаракат қиляпмиз. Куз келишига оз қолди, аммо саммитга тайёргарлик кўриш ва давлатларнинг кўпи унда иштирок этиши учун ҳали вақт бор”, — деди Зеленский.
Зеленский ва унинг жамоаси иттифоқчилар билан урушни тезроқ тугатиш мақсадида “тинчлик саммити” ўтказишни қўллаб-қувватламоқда.
Саммитнинг кун тартиби Киев томонидан 2022 йил кузда ишлаб чиқилган 10 банддан иборат режага асосланган.
Ундаги тинчлик концепцияси Украинанинг ҳудудий яхлитлигини тўлиқ тиклаш ва Россия қўшинларини тўлиқ олиб чиқиш, озиқ-овқат, энергия ва ядро хавфсизлигини таъминлаш, барча маҳбусларни озод қилиш ва бошқа бандларни назарда тутади. Саммит ўтказиладиган жой ҳали аниқланмаган. Украина ва Ғарб расмийлари Россия саммитда иштирок этмаслигини айтди.
Изоҳ (0)