“Россия Украинадаги можарони ҳал қилиш масаласини муҳокама қилишга тайёр” — Мария Захарова

Россия Украинадаги можарони дипломатик йўл билан ҳал қилиш муҳокамаси учун очиқлигича қолмоқда ва ҳақиқатан ҳам жиддий таклифларга жавоб беришга тайёр, деди Россия ТИВ матбуот котиби Мария Захарова.

У бу ҳақида Жиддада бўлиб ўтган Украинадаги вазиятни тинч йўл билан ҳал қилиш бўйича учрашувни изоҳлай туриб айтиб ўтган.

“Биз Глобал Жанубдаги дўстларимизнинг тинчликка эришишга қаратилган воситачилик ва инсонпарварлик ташаббусларини юқори баҳолаймиз. Россия билан музокараларни тўхтатиб қўйган ва тақиқлаган Киев режимидан фарқли ўлароқ, биз муаммони дипломатик йўл билан ҳал қилиш учун доимо очиқ бўлганмиз ва шундай бўлиб қоламиз. Можарони ҳал қилиш учун ҳақиқатан ҳам жиддий таклифларга жавоб беришга тайёрмиз. Фақат Россия иштирокисиз ва унинг манфаатларини ҳисобга олмасдан ўтказиладиган учрашувлар заррача қийматга эга бўлмаслигини эслатиб қўймоқчимиз”, — дейилади ТИВ сайтидаги хабарда.

Шанба куни Жиддада Украина бўйича музокаралар бўлиб ўтди, унда 30 га яқин давлат вакиллари иштирок этди. Россия бу йиғилишга таклиф қилинмади.