Ukraina prezidenti Vladimir Zelenskiy SCALP raketalarini olganini ma’lum qildi. Fransiya prezidenti Emmanuel Makron iyul oyida bunday raketalarni Ukrainaga topshirish qarorini e’lon qilgan bo‘lsa, Qurolli kuchlar vaziri Sebastyan Lekornyu snaryadlarning bir qismi Ukrainaga yetkazilganini ma’lum qilgan edi.
SCALP-EG raketasi Ukraina armiyasi tomonidan allaqachon qo‘llanayotgan Britaniyaning Storm Shadow raketasining fransuzcha versiyasidir. Raketaning uchish tezligi 1000 km/soatdan oshadi. 500 km gacha bo‘lgan masofadagi nishonlarni urish imkoniyatiga ega.
Ukraina Qurolli kuchlari kuni munosabati bilan Zelenskiyning ijtimoiy tarmoqlardagi sahifalarida video paydo bo‘ldi. Unda davlat rahbari Patriot va IRIS-T havo hujumidan mudofaa tizimlarining faoliyati to‘g‘risidagi hisobotni tinglayotgani, Su-25, Su-24M, Su-27, MiG-29 samolyotlarini ko‘zdan kechirayotgani aks etgan.
Zelenskiyga samolyotlar ittifoqchilar tomonidan yetkazib berilayotgan qurollarga moslab modernizatsiya qilingani haqida ma’lum qilindi. Bunga Storm Shadow uzoq masofaga uchadigan raketalar va AGM HARM radiolokatsiyaga qarshi raketalar kiradi.
Rossiya Federatsiyasi prezidenti matbuot kotibi Dmitriy Peskov Fransiyaning raketalar yetkazib berish haqidagi qarorini xato deb atadi. Uning so‘zlariga ko‘ra, bu “Ukraina tomoni uchun salbiy oqibatlarga olib kelishi mumkin”.
Izoh (0)