Саудия Арабистонининг Жидда шаҳрида Украина ва Россия ўртасидаги урушни тинч йўл билан ҳал қилиш бўйича олиб борилган музокараларда маълум натижага эришилди. Бу ҳақда Хитой Ташқи ишлар вазирлигига таяниб, Reuters хабар берди.
Вазирликка кўра, Саудияда бўлиб ўтган саммит “халқаро консенсусни мустаҳкамлашга” ёрдам берди. Хитой тадбирга Россиядаги собиқ элчиси, Евросиё масалалари бўйича махсус элчи Ли Хуэйни юборди. Дипломат “Украинадаги инқирозни сиёсий йўл билан ҳал қилиш бўйича барча томонлар билан кенг кўламли алоқа ва мулоқотлар ўтказган”.
“Дипломат барча томонларнинг фикр ва таклифларини тинглаган ҳамда халқаро консенсусни янада мустаҳкамлашни илгари сурган”, — дейилади хабарда.
Вазирликнинг таъкидлашича, “барча томонлар Ли Хуэйнинг иштирокини ижобий баҳолаган ва Хитойнинг тинчлик музокараларига кўмаклашишдаги ижобий ролини тўлиқ қўллаб-қувватлаган”.
Пекин НАТОга аъзо Даниядаги аввалги музокараларга қўшилишдан бош тортган бўлса-да, Россия таклиф этилмаган Саудия Арабистонидаги музокараларда қатнашди.
“Пекин тобора кўпроқ тинчлик саъй-ҳаракатларига эътибор қаратмоқда, бироқ у Хитой бошчилигидаги тинчлик ташаббуси ҳозирда Ғарб томонидан қўллаб-қувватланмаслигини ҳам билади. Хитой Ғарб бошчилигидаги бошқа ишончли тинчлик ташаббусларидан четда қолишни истамайди”, — дейди Вашингтондаги Стимсон таҳлил марказининг Хитой дастури директори Юн Сун.
Россиянинг позицияси
Россия томони Жиддага таклиф қилинмаган, Кремль 31 июль куни “Россия бу учрашувни кузатишини” маълум қилди. Ўшанда Путин матбуот котиби Дмитрий Песков “музокара иштирокчилари ўз олдига қандай мақсад қўйгани ва нима ҳақида гаплашмоқчи эканини тўлиқ тушуниш керак”лигини билдирди.
ТИВ матбуот котиби Мария Захарова 2 август куни Россия Жиддадаги учрашувни “Россияга қарши коалиция тузиш”га уриниш сифатида баҳолашини айтди.
Россия Хавфсизлик кенгаши раиси ўринбосари Дмитрий Медведев 6 август куни “урушни тугатиш истагини қоралаш қийин”, деб таъкидлади.
У тарихий контекст ва ҳозирги воқеликни инобатга олиш кераклигини айтди. Медведев конфликтнинг ҳар икки томонининг иштироки каби шартлар бажарилсагина, тинчлик таклифлари муваффақиятли бўлиши мумкинлигини билдирди.
Изоҳ (0)