Украина хавфсизлик хизмати (УХХ) президент Владимир Зеленскийнинг Николаев вилоятига ташрифи чоғида бу ҳудудга зарба тайёрлашга ёрдам бергани айтилган аёлни қўлга олди. Бу ҳақда УХХнинг Telegram каналида хабар берилди.
УХХ ҳибсга олинган аёлни “Россия жосуси” деб атаган. Бу аёл Очаков шаҳрида яшаган бўлиб, вилоятдаги ҳарбий қисмлардан бири ҳудудида жойлашган дўконда сотувчи бўлиб ишлаган.
Разведка хизматининг таъкидлашича, Зеленский Николаев вилоятига сафари арафасида аёл ташриф ҳақида маълумот тўплаган.
“Қўлга олинган аёл биринчи навбатда, давлат раҳбарининг минтақадаги тахминий маршрутининг вақти ва манзиллари рўйхатини аниқлашга уринган”, — дейилади УХХ хабарида.
УХХ аёлнинг “разведка ва қўпорувчилик фаолияти тўғрисида олдиндан маълумотга эга бўлгани” ва Зеленскийнинг ташрифи чоғида қўшимча хавфсизлик чоралари кўрилганини таъкидлади.
Маълум қилинишича, аёл разведка маълумотларини узатишга уринаётганда қўлга олинган. У 12 йилгача қамоқ жазосига ҳукм қилиниши мумкин.
Зеленский июль ойи охирида Николай ва Одесса вилоятларига ташриф буюрган эди. Ўшанда у Николаев, Одесса ва Очаковдаги касалхоналарга ташриф буюрган.
Изоҳ (0)