Ukraina xavfsizlik xizmati (UXX) prezident Vladimir Zelenskiyning Nikolayev viloyatiga tashrifi chog‘ida bu hududga zarba tayyorlashga yordam bergani aytilgan ayolni qo‘lga oldi. Bu haqda UXXning Telegram kanalida xabar berildi.
UXX hibsga olingan ayolni “Rossiya josusi” deb atagan. Bu ayol Ochakov shahrida yashagan bo‘lib, viloyatdagi harbiy qismlardan biri hududida joylashgan do‘konda sotuvchi bo‘lib ishlagan.
Razvedka xizmatining ta’kidlashicha, Zelenskiy Nikolayev viloyatiga safari arafasida ayol tashrif haqida ma’lumot to‘plagan.
“Qo‘lga olingan ayol birinchi navbatda, davlat rahbarining mintaqadagi taxminiy marshrutining vaqti va manzillari ro‘yxatini aniqlashga uringan”, — deyiladi UXX xabarida.
UXX ayolning “razvedka va qo‘poruvchilik faoliyati to‘g‘risida oldindan ma’lumotga ega bo‘lgani” va Zelenskiyning tashrifi chog‘ida qo‘shimcha xavfsizlik choralari ko‘rilganini ta’kidladi.
Ma’lum qilinishicha, ayol razvedka ma’lumotlarini uzatishga urinayotganda qo‘lga olingan. U 12 yilgacha qamoq jazosiga hukm qilinishi mumkin.
Zelenskiy iyul oyi oxirida Nikolay va Odessa viloyatlariga tashrif buyurgan edi. O‘shanda u Nikolayev, Odessa va Ochakovdagi kasalxonalarga tashrif buyurgan.
Izoh (0)