Бухоро вилоятида 300 миллион сўмга яқин пулларни виртуал фирибгарлик йўли билан қўлга киритган шахс ушланди. Бу ҳақда вилоят ИИБ ахборот хизмати хабар берди.
Қайд этилишича, 2023 йилнинг январидан март ойига қадар номаълум шахс Бухоро шаҳрида яшовчи 1979 йилда туғилган фуқарога тегишли “Халқ банки” пластик картаси ва яна 69 кишининг пластик карталаридан жами 295 миллион пулни алдов йўли билан қўлга киритган.
Ҳолат юзасидан Бухоро шаҳар ИИО ФМБ томонидан номаълум шахсга нисбатан Жиноят кодексининг 168-моддаси (фирибгарлик) билан жиноят иши қўзғатилиб, тезкор-техник суриштирув ҳаракатлари олиб борилган.
Натижада ушбу жиноятни Бухоро шаҳрида яшовчи 23 ёшли шахс содир этгани аниқланган. Ҳозирда унинг Бухоро вилояти ва республиканинг бошқа ҳудудларидаги жиноятларга алоқадорлиги текширилмоқда.
Пластик карталардан пул ўғирлаш ҳолатлари
Апрель ўрталарида Наманганда мактаб ўқувчиси устозининг пластик картасидан 2 миллион сўм ечиб олгани тўғрисида хабар берилганди. 2022 йил июлда эса Андижонда 8-синф ўқувчиси ўнлаб фуқароларнинг пулларини қўлга киритиб, PUBG ўйинига тикиб юборгани аниқланган эди. Июль бошида бўлса, Бухоро вилояти Ғиждувон туманидаги банк филиали кассири мижозларнинг 41 та банк карталаридаги маблағларни ўғирлагани маълум бўлди.
Изоҳ (0)