Самарқанд вилоятида икки нафар фуқарони ноқонуний йўллар билан хусусий ОТМга киритишни ваъда қилган шахс қўлга олинди. Бу ҳақда вилоят ИИБ ахборот хизмати хабар берди.
Маълум қилинишича, Иштихон туманида туғилган, мазкур тумандаги мактабларнинг бирида ўқитувчилик қилиб келаётган 24 ёшли Н.А. ўз мансаб фаолиятидан фойдаланган ҳолда икки нафар фуқарони Самарқанд вилоятида очилиши режалаштирилган “Нукус Инновацион Институти” номли хусусий олийгоҳнинг 2-босқичидан ўқишга киритишни ваъда қилган. У фуқароларнинг ҳар биридан 500 доллардан, жами 1 000 доллар миқдоридаги пул маблағларини талаб қилган.
ДХХ Самарқанд вилояти бўйича бошқармаси ҳамда прокуратура ҳузуридаги департамент ходимлари билан ўтказилган тезкор тадбирда, Н.А. икки нафар фуқаролардан фирибгарлик йўли билан 1 000 доллар миқдоридаги пулларни олаётган вақтида жиноят устида қўлга олинган.
Ҳозирда ушбу шахсларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Ноқонуний ўқишга киритиш ҳолатлари
Аввалроқ, Фарғона, Андижон, Гулистон давлат университетлари ва “Нархоз”га ўқишга киритиб қўйиш эвазига пул олган шахслар ушлангани хабар қилинганди. Шунингдек, Андижонда ўқишга киритишни ваъда қилиб, 4 минг АҚШ доллари олган ОТМ ходими қўлга олинган эди.
Изоҳ (0)