“Ўзгидромет” дам олиш кунлари ҳарорат аста-секин пасайишини маълум қилди.
Қайд этилишича, 4—5 август кунлари Ўзбекистон бўйича ўртача иссиқ об-ҳаво сақланиб туради. Ҳаво ҳарорати 35-38 даража атрофида, баъзи жойларда 40 даражагача, жанубда баъзи жойларда 42 даражагача иссиқ бўлади.
Ҳудуднинг катта қисмида ҳаво асосан бир оз булутли бўлади, ёғингарчилик кутилмайди. Фақат 5 август куни шимоли-ғарбий ҳудудларга Жанубий Урал ҳудудларидан нисбатан нам ва салқин ҳаво массалари кириб келиши бошланади. Қорақалпоғистон Республикаси ва Хоразм вилоятида 5 август куни баъзи жойларда қисқа муддатли ёмғир ёғиши, момақалдироқ бўлиши мумкин, ҳаво ҳарорати 32-37 даражагача пасаяди.
6 август, якшанба куни нисбатан нам ва салқин ҳаво массалари кириб келиши республиканинг барча ҳудудларига тарқалади. Кундузги ҳарорат барча жойларда 30-35 даражагача, жанубда 35-38 даражагача пасаяди. Булутли об-ҳаво бўлиши кутилмоқда.
Республика ҳудудининг катта қисмида ёғингарчиликсиз об-ҳаво сақланиб туради, фақат республиканинг тоғолди ва тоғли ҳудудларида, шунингдек, Бухоро, Навоий вилоятларида, кечаси эса Хоразм вилоятида баъзи жойларда қисқа муддатли ёмғир ёғиши, момақалдироқ бўлиши мумкин.
Тошкентда 4—6 август кунлари ҳаво бир оз булутли бўлади, вақти-вақти билан ўзгариб туради, ёғингарчилик кутилмайди. Ҳарорат 38-40 даражадан 33-35 даражагача аста-секин пасаяди.
Аввалроқ ёмғир ёғиши кутилаётгани сабабли 6—9 август кунлари республиканинг тоғолди ва тоғли ҳудудларида сел-сув тошқини юзага келиши мумкинлиги хабар қилинганди.
Изоҳ (0)