Ўзбекистоннинг қатор вилоятларида табиий ресурслардан ноқонуний фойдаланиш ҳолатлари фош этилмоқда, деб хабар беради Бош прокуратура ҳузуридаги департамент.
Қайд этилишича, департаментнинг Бойсун туман бўлими томонидан “Сувинспекция” Сурхондарё вилоят ҳудудий бўлими ходимлари билан ҳамкорликда терговга қадар текширув ўтказилган. Текширув давомида ҳудуддаги 7 та фермер хўжалиги масъул шахслари ҳеч қандай ҳужжатсиз магистрал ичимлик суви тармоғига ўзбошимчалик билан уланиб, давлат ва жамият манфаатларига жами 1,2 миллиард сўм зарар етказгани аниқланган.
Худди шундай, департаментнинг Фарғона вилоят бошқармаси томонидан ўтказилган терговга қадар текширувда “С.С.” фермер хўжалиги раҳбари Б.Н. Қува тумани “Маданият” МФЙ сув насосларини ҳеч қандай ҳужжатларсиз умумий фойдаланишдаги электр тармоғига ўзбошимчалик билан улаб, жами 481,5 миллион сўмлик электр энергиясидан ноқонуний фойдалангани маълум бўлган.
Департаментнинг Қўштепа туман бўлими томонидан ЭТК ходимлари билан ҳамкорликда ўтказилган терговга қадар текширувда эса “Д.” фермер хўжалиги масъул шахслари дала майдонини суғориш учун ўрнатилган сув насосини умумий фойдаланишдаги тармоққа электрон дастурга киритилмаган ҳисоблагич орқали ўғрилик йўли билан улаб, жами 148,9 минг кВт/с электр энергиясидан ноқонуний фойдаланиб келгани аниқланган.
Зангиота туманида бўлса фуқаро Ш.И. Эркин кўчасидаги уйда ҳеч қандай ҳужжатсиз ташкил этган фермада умумий фойдаланишдаги газ тармоғига ўғрилик йўли билан уланиб, жами 130 миллион сўмлик табиий газдан ноқонуний фойдаланиб келгани аниқланган.
Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) ва 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Жиззах, Андижон ва Фарғона вилоятларида электрдан ноқонуний фойдаланганлар 913,5 миллион сўм зарар етказгани тўғрисида хабар берилганди. Шунингдек, Ўзбекистоннинг уч вилоятида газ ва светдан ноқонуний фойдаланганлар қарийб 352 млн сўм зарар етказганди.
Изоҳ (0)