Фарғона вилоятидаги Valley innovative university МЧЖга нодавлат таълим хизматларини кўрсатиш фаолияти учун берилган лицензияси бекор қилинди.
Қайд этилишича, Фарғона туманлараро иқтисодий судининг 2023 йил 17 июлдаги ҳал қилув қарори билан Valley innovative university масъулияти чекланган жамиятига 2022 йил 13 декабрда нодавлат таълим хизматларини кўрсатиш фаолияти учун берилган 053546-сонли лицензия бекор қилинган. Бўлиб ўтган суд мажлиси муҳокамаларида олий таълим ташкилоти фаолиятида аниқланган қўпол қоидабузарликлар судга тақдим этилган асосли ҳужжатлар билан ўз исботини топган.
Нодавлат таълим соҳасида умумий ва алоҳида лицензия талаблари ҳамда шартларига риоя этишда қатор қўпол қоидабузарликларга йўл қўйгани аниқланган. Жумладан,
- мазкур олий таълим ташкилотининг лицензияда кўрсатилган фойдаланиш учун ажратилган бино-иншоотлари муассисларга мулк ҳуқуқи ёки ижара шартномаси асосида тегишли эканини тасдиқловчи ҳужжатлар мавжуд эмас;
- Олий таълим, фан ва инновациялар вазирлигининг HEMIS ахборот тизимига таълим олувчилар ва педагог ходимлар тўғрисида тўғри ва тўлиқ маълумотлар киритилмаган;
- ваколатли давлат органи билан келишилган ҳолда ёшлар масалалари ва маънавий-маърифий ишлар билан шуғулланадиган ректор маслаҳатчиси штат бирлиги жорий этилмаган;
- таълим ташкилотининг банкдаги ҳисоб варағида 150 минг доллар ёки шу миқдор эквивалентдаги маблағ мавжуд эмас;
- 60 та компьютер техникаси билан жиҳозланган электрон кутубхона ва 20 та компьютер техникаси, сканер ва нусха кўчириш аппарати билан жиҳозланган ахборот-ресурс маркази ташкил этилмаган;
- таълим олувчилар ҳар бир фандан ўқув адабиётлари (дарсликлар, ўқув қўлланмалари) билан таъминланмагани аниқланган.
Июль ўрталарида Олий таълим, фан ва инновациялар вазирлиги Ат-Термизий номидаги халқаро университетга олий таълим хизматларини кўрсатиш учун лицензия берилмаганини маълум қилганди. “Таълим тўғрисида”ги қонуннинг 29-моддасига асосан, нодавлат таълим ташкилотлари лицензия олинган кундан эътиборан таълим фаолияти билан шуғулланишга ҳақлидир.
Изоҳ (0)