Ўзбекистоннинг икки вилояти: Тошкент ва Самарқандда газ ҳамда “свет”дан ноқонуний фойдаланганлар 2,3 млрд сўмдан зиёд зарар етказди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Хабарга кўра, Бош прокуратура ҳузуридаги департаментнинг Нарпай туман бўлими томонидан газ таъминоти бўлими ходимлари билан ҳамкорликда ўтказилган терговга қадар текширувларда, Нарпай туманида яшовчи Ш.С. ва “Х.Б.” фермер хўжалиги раҳбари У.Н. яширин оҳак ишлаб чиқариш цехи ташкил этиб, жами 1,7 миллиард сўмлик табиий газдан ноқонуний фойдалангани аниқланган.
Шу каби, Самарқанд туманида “А.Х.” фермер хўжалиги, Юқори Чирчиқ туманида “Е.О.” МЧЖ, Қибрай туманида “Ф.Й.” МЧЖ, Тошкент туманида “Ш.О.” фермер хўжалиги ва Янгиариқ туманида фуқаро Ж.Т. табиий газ ва электр тармоқларига ўзбошимчалик билан уланиб, жами 661,4 миллион сўмлик табиий ресурслардан ноқонуний фойдалангани аниқланган.
Мазкур ҳолатлар юзасидан Жиноят кодексининг 169-моддаси (ўғрилик) ва 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)