Қирғизистон икки ярим йил давомида мамлакат қуролли техникасини янгилашга 125 миллиард сом (1,422 миллиард доллар) йўналтирди. Бу ҳақда Миллий хавфсизлик давлат қўмитаси (МХҚ) раҳбари Қамчибек Ташиев ҳукумат йиғилишида маълум қилди, деб хабар бермоқда AKIpress.
Ташиевнинг қайд этишича, 2005—2020 йилларда Қирғизистон худди шу мақсадлар учун 3-5 миллиард сом (34-56 миллион доллар) сарфлаган. Таққослаш учун, у биргина 2021 йилда мамлакат ҳукумати қуролларни янгилашга 32 миллиард сом (364 миллион доллар), 2022 йилда 53 миллиард сом (603 миллион доллар), 2023 йилнинг олти ойи учун 40 миллиард сомдан (455 миллион доллар) кўпроқ маблағ ажратганини санаб ўтди.
“Икки ярим йил давомида 120 миллиард сомдан ортиқ. Бу жуда кенг кўламли янгиланиш”, — деди Миллий хавфсизлик давлат қўмитаси раҳбари.
Ташиевнинг сўзларига кўра, бу пулларга жумладан, Bayraktar, Аksungur, “Акинжи” дронлари, “Печора” зенит-ракета мажмуаси, Мi-8, Мi-17 вертолётлари харид қилинган.
“Буларни совға сифатида олганимиз йўқ, барчаси давлат бюджети маблағлари ҳисобидан сотиб олинди”, — деди Ташиев.
2023 йилнинг январь ойида Sputnik Қирғизистон ҳукумати давлат амалдорларига бериладиган мукофот пулларини тежаш орқали Туркия дронларини сотиб олгани ҳақида хабар берганди. Туркиянинг Bayraktar ТB2 ҳужумчи дрони Қирғизистон Миллий хавфсизлик давлат қўмитаси чегара хизматига биринчи марта 2021 йил декабрь ойида олиб келинган.
2022 йил декабрь ойида Қирғизистон президенти Садир Жапаров бюджетдан сотиб олинган Airbus H145 вертолётини синовдан ўтказган.
Изоҳ (0)