Қирғизистон ҳукумати ва давлат корхоналари АҚШ ҳамда қатор Ғарб давлатлари томонидан Россияга қарши жорий қилинган санкцияларни бузгани йўқ, бироқ бунга хусусий компаниялар алоқадор бўлиши ҳам мумкин, деб хабар берди Қирғизистон Миллий хавфсизлик давлат қўмитаси. Муассаса ушбу ҳолат юзасидан текширув бошлашга қарор қилди.
“Тасдиқ билан айтишимиз мумкинки, на Қирғизистон давлати, на давлат тузилмалари ва компаниялари АҚШ ҳамда Ғарб давлатлари томонидан Россияга нисбатан жорий этилган санкция чекловларининг бузилишига алоқадор эмас”, — дейилади расмий баёнотда.
Қирғизистон бош вазири Оқилбек Жапаров “Интерфакс”га берган интервьюсида Россияга қарши чекловлар бузилгани бўйича санкциялар қўллашга ҳеч қандай сабаб йўқлигини айтди. Унинг сўзларига кўра, республикада маҳсулотларнинг санкцияларни бузган ҳолда экспорт қилинишига йўл қўймаслик чоралари кўрилган.
“Товарларни чегарадан ўтказишдаги шаффофлик туфайли экспорт ва маблағ тушумлари бўйича реал маълумотлар бор. Биз тўғри йўналишда ишлаяпмиз: товарларни кузатиш шаффофлаштирилган, шунинг учун фавқулодда ҳолатларда декларация қилинмаган юкларни аниқлаш учун тадбиркорлардан электрон ҳисоб-фактура олишларини сўрайман”, — деди Жапаров.
Қирғизистон Вазирлар Маҳкамаси раҳбарининг қўшимча қилишича, экспортни кўпайтириш ва Қирғизистон томонидан санкцияларнинг четлаб ўтилиши эҳтимоли бўлган ҳолатлар Ғарб делегациялари вакиллари билан бир неча бор муҳокама қилинган.
19 июль куни The Washington Post газетаси АҚШ Россияга нисбатан жорий этилган санкцияларни бузгани учун Қирғизистонга қарши иқтисодий чоралар кўраётгани ҳақида хабар берди. Нашрнинг ёзишича, Вашингтон Бишкекни Россияга Хитой дронларини етказиб беришда гумон қилмоқда.
Изоҳ (0)