Facebook ижтимоий тармоғи фойдаланувчиси Аида Сасибаева Қирғизистон президенти Садир Жапаровдан қирғиз халқини ҳақорат қилгани учун узр сўрашни талаб қилди, деб ёзмоқда “24.kg” ахборот агентлиги.
Аида Сасибаева президент қирғизларни дангаса деб атагани унга ёқмаганини таъкидлади.
“Бу менинг миллий қадр-қимматимга путур етказади, сиздан кечирим сўрашни талаб қилмоқчиман. Мулоҳазасиз фикрларингиз билан менинг ватаним ва халқим обрўсини туширяпсиз. Бундай камситувчи тавсиф туфайли бошқа мамлакатларда биз ҳақимизда нохуш фикр пайдо бўлиши мумкин. Бундан ташқари, бундай токсик муносабат болаларга салбий таъсир қилади, болаларнинг ўзи ҳақидаги, ота-онаси, қариндошлари ва бутун халқи ҳақидаги тасаввурларини бузади”, — деб ёзди Сасибаева.
Аида Сасибаева президент “ўзига келиб, омма олдида кечирим сўрашига” умид билдирди.
“Акс ҳолда, мен барча ижтимоий тармоқларда флеш-моб эълон қилишга мажбур бўламан. Акцияга етарлича одам қўшилиши билан уни бошлаш санасини аниқлаймиз”, — деди у.
Унинг сўзларига кўра, норозилик акцияси сиёсий ёки маданий эмас, балки умумреспубликавий бўлади.
Аввалроқ Садир Жапаров Транспорт ва коммуникациялар вазирлигига йўл техникасини топшириш маросимида қозоғистонлик ва қирғизистонлик йўл қурувчилар ҳақида латифа айтганди. Шундан сўнг Жапаров қирғизларнинг “дангасалиги туфайли” президент маъмуриятига мўлжалланган бино секин қурилаётганини таъкидлади.
Изоҳ (0)