Хитой НАТОнинг рақиби эмас, бироқ иттифоқчилар Хитойга бир қатор соҳаларда, жумладан, муҳим хом ашё етказиб беришда қарам бўлишига йўл қўймасликлари керак, деди НАТО бош котиби Йенс Столтенберг Tagesspiegel нашрига берган интервьюсида.
“Хитойни иқтисодий жиҳатдан ажратиб қўйиш ёки изоляция қилиш ҳақида гап кетаётгани йўқ. Хитой бизнинг душманимиз эмас, биз яқиндан фикр алмашишимиз ва савдо-сотиқни давом эттиришимиз керак. Мен фақат хом-ашё таъминоти каби муайян соҳаларда Хитойга қарамликдан эҳтиёт бўлишга чақиряпман”, — дейди Столтенберг Германия канцлери Олаф Шольцнинг Хитой бош вазири Ли Цян билан сўнгги музокараларини изоҳлар экан.
Ўтган йили Ғарбнинг Хитой билан муносабатлари Тайван атрофида кучайиб бораётган кескинлик ва Украинадаги ҳарбий операция муносабати билан ёмонлашди.
Май ойида Хитой Ташқи ишлар вазирлиги вакили Ван Венбин НАТОнинг Японияда ваколатхонани очиш режаларидан хавотир билдирганди. У альянс Осиё-Тинч океани минтақаси давлатлари ишларига аралашаётганини таъкидлади.
Аввалроқ Ван Венбин 1999 йилда НАТО томонидан Хитойнинг Белграддаги элчихонаси бомбардимон қилинганини Хитой халқи ҳеч қачон унутмаслигини айтиб ўтганди.
Изоҳ (0)