АҚШ президенти Жо Байденнинг ўғли Хантер Байден АҚШ прокуратураси олдида айбини тан олишга рози бўлди ва ҳуқуқ-тартибот идоралари билан келишувга эришди, деб хабар бермоқда Daily Mail.
Суд баёнотида айтилишича, 53 ёшли Хантер Байден 2017 ва 2018 йилларда 100 минг доллардан ортиқ солиқ тўлашдан бўйин товлаганини тан олган, у ушбу даврда йилига 1,5 миллион доллардан кўпроқ даромад орттирган.
Шунингдек, суд ҳужжатида қайд этилишича, Адлия вазирлиги кичик Байденга қарши айбловлар қўзғатади, аммо уни 2018 йилда енгил ўқотар қурол сотиб олгани учун жиноий жавобгарликка тортмасликка рози бўлади. Ўшанда Хантер Байден гиёҳванд моддалар ҳам истеъмол қилган. Суд билан келишувга кўра, Байден икки йил давомида гиёҳванд моддалардан йироқ бўлиши ва бошқа ҳеч қачон ўқотар қуролга эгалик қилмаслик шартларига рози бўлиши керак.
Хантер Байден ва Делавер штатидаги прокуратура ўртасидаги келишув федерал судья томонидан тасдиқланиши керак.
Умуман олганда, президентнинг ўғли АҚШ Адлия вазирлиги билан солиқ ва ўқотар қуролларга боғлиқ учта айблов бўйича келишувга эришди — унинг доирасида Хантер қамоққа ташланмайди ва ундаги айблов олиб ташланади. АҚШда терговчилар билан бундай битим гиёҳванд моддалар истеъмол қилинган, аммо ҳеч қандай зўравонлик кузатилмаган жиноятлар учун тузилиши мумкин.
АҚШ президенти Жо Байден солиқ қонунчилигини бузиш бўйича айбини тан олган ўғли Хантер билан жуда фахрланишини айтди.
Хантернинг ҳуқуқ-тартибот идоралари билан келишуви ҳақида изоҳ сўраган журналистларга Байден: “Мен ўғлим билан жуда фахрланаман”, деб жавоб берди.
Эслатиб ўтамиз, АҚШ собиқ президенти Дональд Трамп ва унинг иттифоқчилари йиллар давомида Хантер Байденни Украина ва Хитойдаги фаолияти билан боғлиқ қонунбузарликларда айблаб келади. Республикачилар фикрича, АҚШ президенти Жо Байден бу ҳаракатлардан хабардор бўлган.
2020 йилда кичик Байден федерал прокурорлар унинг солиқ ҳисоботларини кўриб чиқаётганини айтганди. Ўшанда Жо Байден Адлия вазирлиги унинг оила аъзоларига қарши ҳар қандай терговни мустақил олиб боришига ишонтирган.
Изоҳ (0)