Хитой ТИВ Байденнинг Си Цзиньпинни диктатор деб атаган сўзларига норозилик билдирди

Хитой Ташқи ишлар вазирлиги АҚШ президенти Жо Байденнинг Си Цзиньпинни диктатор деб атаган баёнотига норозилик билдирди.

“Америка томонининг баёнотлари дипломатик одоб-ахлоқ қоидаларини бузади, бу масъулиятсизлик ва очиқ сиёсий провокациядир”, — дея таъкидлади Хитой ТИВ.

Байден Калифорниядаги тадбирда нутқ сўзлар экан, Си Цзиньпин АҚШ ҳаво ҳудудида Хитой шарлари топилиб, уриб туширилганидан эсанкираб қолганини, чунки у Пекиннинг бу миссиясидан бехабар бўлганини айтган.

“Си Цзиньпин мен жосуслик аппарати бор ўша ҳаво шарини уриб туширганимдан жуда норози бўлганига сабаб — у шар ҳақида билмаган” — деди Байден. “Нима бўлаётганини билмаслик эса диктаторларга ёқмайди”.

18—20 июнь кунлари АҚШ Давлат котиби Энтони Блинкен Хитойда бўлди. Сафари давомида у ХХР ташқи ишлар вазири Син Ган, Хитой дипломатияси куратори Ван Йи, кейин эса Си Цзиньпин билан учрашди. Блинкен сўнгги беш йил ичида Хитойга ташриф буюрган энг юқори мартабали АҚШ расмийсига айланди. Томонлар суҳбат очиқ ва мазмунли ўтганини таъкидлади. Пекин бугунги кунда икки давлат ўртасидаги муносабатлар энг паст даражада эканини қайд этди.

Блинкен “жосус” шарлар мавзусини ўтмишда қолдиришни таклиф қилди ва Пекинга ташрифини АҚШ—Хитой муносабатларини барқарорлаштиришда муҳим қадам деб атади.