Британиялик мудофаа бўйича таҳлилчи Майкл Кларк Украинанинг Каховка платинаси портлашига алоқадорлигини рад этди ва бу ҳужум фақат Россия учун фойдали эканини таъкидлади. Бу ҳақда у Sky News’га берган интервьюсида фикр билдирди.

Кларкнинг қайд этишича, портлаш Россия томонида содир бўлган.

“Тўғонга қилинган ҳужум ортида Украина турганига ишониш қийин, чунки у бу билан ҳеч нарсага эриша олмайди. Шундай бўлган тақдирда ҳам портлаш тўғоннинг Россия томонида юз берганини эслаш керак”, — дейди таҳлилчи.

Шунингдек, у Днепрдаги сув сатҳининг юқорилиги Украина Қуролли кучларининг қарши ҳужум вақтида дарёдан ўтишига тўсқинлик қилиши мумкинлигини ҳам прогноз қилди.

“Бу Қрим ва Қримда яшовчи руслар учун ёмон бўлса-да, шубҳасиз, Украинадан кўра кўпроқ Россия томонидан содир этилган деб ўйлайман. Украина бундан ҳеч қанақасига манфаатдор эмас, Россияга эса кўп фойдаси бор”, — дея қўшимча қилди у.

Каховка ГЭСнинг вайрон бўлиши; Украинада қандай далиллар бор?

6 июнга ўтар кечаси Херсон вилоятидаги Каховская ГЭСи портлатилди. Украина ва Россия ҳодисада бир-бирини айбламоқда ҳамда бир-бирига қўйилган айбловларни рад этмоқда. Станция бутунлай вайрон бўлган, айрим ҳудудларда сув сатҳи ўта оғир, 80 га яқин аҳоли пункти сув босиш хавфи остида.

Украина жануби мудофаа кучларининг Бирлашган мувофиқлаштирувчи матбуот маркази раҳбари Наталя Гуменюкнинг сўзларига кўра, босқинчилар шу йўл билан Украина Қуролли кучлари қарши ҳужумининг олдини олмоқчи бўлган.

Унинг аниқлик киритишича, душман шошилинч қадам ташлаган ва энди унинг ўзи сув босган ҳудудлардан қандай қочишни билмаяпти. Россия олдиндан ГЭСга зарба беришга тайёргарлик кўргани таъкидланган.

Ўз навбатида, Украина разведкаси (ГУР) раҳбари Андрей Юсовнинг айтишича, Украинада Россия станцияни қандай портлатганига оид далиллар бор. Хусусан, душман ГЭС тўғонини масофадан туриб портлатиб юборган.