Херсон вилоятининг Россияга қўшиб олинган қисмида жойлашган Нова Каховка шаҳридаги Каховка ГЭС тўғонининг вайрон бўлиши оқибатида “Казкова диброва” ҳайвонот боғи сув остида қолди, деб хабар бермоқда “РБК-Украина” маҳаллий Telegram каналларига таяниб.
Нашрнинг ёзишича, ҳодиса оқибатида барча ҳайвонлар нобуд бўлгани тахмин қилинмоқда. Журналист Андрей Смолний ҳайвонларнинг бир қисми аллақачон ўлган бўлиши мумкинлигини ёзди. “РБК-Украина” маълумотларига кўра, 2022 йил февраль ҳолатига кўра ҳайвонот боғида 260 та жонивор боқилаётганди.
Нова Каховканинг қонуний мери Владимир Коваленко “Страна” нашрига берган изоҳида ҳайвонот боғи биринчилардан бўлиб сув остида қолганини айтди. “У ердаги ҳайвонларнинг тақдири қандай кечганини айтиш мен учун оғир. Чунки руслар тунда у ерга ходимларнинг киришига рухсат бермаган. Эрталаб келган ходимлар боғга кира олмаган, чунки у ерни сув босганди”, — деди Коваленко.
Шаҳар мери, шунингдек, “Украинская правда” нашрига ҳозирда алоқа билан боғлиқ муаммолар туфайли шаҳардан маълумот олиш қийинлигини айтди. У Россия назоратидаги ҳудудда одамлар ахборот вакуумида қолиши учун сигнал тўсиб қўйилган бўлиши мумкинлигини айтди.
Каховка ГЭС вайрон бўлди
6 июнь куни эрта тонгда ижтимоий тармоқларда Каховка ГЭС тўғони вайрон бўлгани, ундан сув оқиб чиқаётгани ҳақида хабарлар ва видеолар тарқалди. Украина Қуролли кучларининг “Жануб” оператив қўмондонлиги Россия қўшинлари гидроэлектрстанциясини “портлатиб юборганини” маълум қилди. Херсон вилояти маъмурияти раҳбари Александр Прокудин ҳам Россия томони ГЭСни портлатганини маълум қилди. Россия томонидан тайинланган Новая Каховка “мери” Владимир Леонтиев аввалига портлаш ҳақидаги маълумотни рад этди, бироқ кейинроқ “маъмуриятдагилар” Украина томонидан тунги ўққа тутишлар оқибатида ГЭСнинг юқори қисми вайрон бўлгани, аммо тўғон сақланиб қолгани ҳақида айтишди.
“ТАСС” Россия фавқулодда хизматларига таяниб хабар беришича, 80 та аҳоли пунктини сув босиши мумкин. Херсон вилоятининг хавфли ҳудудларидан аҳолини эвакуация қилиш бошланган. Ижтимоий тармоқларда Нова Каховка шаҳрини сув босаётгани акс этган видеолар эълон қилинмоқда.
Изоҳ (0)