Туркиянинг 500 кишидан иборат баталони Косовога НАТО миссиясининг қўшимча кучлари сифатида етиб келди. Бу ҳақда альянс сайтида маълум қилинди.
“НАТО қўшимча кучлари 2023 йил, 5 июнь душанба куни Косовога етиб кела бошлади. Қўшимча кучларнинг асосий қисмини Туркиянинг 65-мотоўқчи бригадасининг 500 га яқин аскари ташкил қилади”, — дейилади хабарда.
Таъкидланишича, турк батальони дастлаб Султон Мурат лагерига жойлаштирилади ва қанча керак бўлса, шунча вақт Косовода қолади. Шунингдек, НАТО захира кучларининг қўшимча батальони ҳам зарурат туғилганда фойдаланиш учун юқори шай ҳолатга келтирилган.
4 июнь куни Туркия президенти Ражаб Тоййиб Эрдўғон билан Истанбулда бўлиб ўтган музокаралардан сўнг альянс бош котиби Йенс Столтенберг унга Косовога қўшимча куч юбораётгани учун миннатдорлик билдирган.
3 июнь кун Туркия НАТОнинг Иттифоқчи бирлашган кучлари қўмондонлиги сўровига кўра Косовога махсус кучлар батальонини жўнатаётгани маълум бўлди. Эртаси куни бу кучларни Косовога жойлаштириш бошлангани хабар қилинди.
Аввалроқ Столтенберг альянснинг 700 аскардан иборат кучлари аллақачон Косовога етиб борганини айтганди. Унинг қайд этишича, бу чора минтақадаги можарони тинч йўл билан ҳал қилиш йўлидан воз кечишни англатмайди.
Май ойи охирида Косово шимолида этник сербларнинг норозилик намойиши тартибсизликка айланди. Аҳолининг хавфсизлик кучлари билан тўқнашувлари оқибатида 52 нафар серб ва НАТОнинг камида 30 нафар ҳарбийси яраланган.