Франция атмосферага карбонат ажралишини камайтириш учун қисқа масофали ички рейсларни тақиқлади

Франция ҳукумати атмосферага карбонат ангидрид ажралишни камайтириш мақсадида барча қисқа масофали ички рейсларни тақиқлади, деб хабар бермоқда BBC.

Поездда икки ярим соат ичида бориш мумкин бўлган йўналишларда авиарейсларни бекор қилиш таклифига қонунчилар икки йил аввал овоз берган эди. Энди самолётлар, масалан, Париждан Нант, Лион ёки Бордога учмайди, бироқ тақиқ танқидчилари буни рамзий деб атамоқда.

Airlines for Europe (А4E) саноат гуруҳи раҳбари вазифасини бажарувчи Лоран Донселнинг AFP'га айтишича, бундай рейсларни тақиқлаш CO2 ажралишига минимал таъсир қилади. Унинг сўзларига кўра, ҳукумат бундай тақиқлар ўрнига ушбу муаммони ҳал қилишда янада реал ёндашувларни қўллаб-қувватлаши керак.

Коронавирус пандемияси бутун дунё бўйлаб авиакомпанияларга катта таъсир кўрсатди. Барча тижорий рейсларни кузатиб борадиган Flightradar24 веб-сайтида айтилишича, ўтган йилги парвозлар сони 2019 йилдан олдинги билан солиштирганда 42 фоизга камайган.

2019 йилда Эммануэл Макрон томонидан яратилган, Франция жамоатчилигининг 150 вакили томонидан имзоланган Иқлим бўйича Фуқаролик конвенциясида поезд билан 4 соат ичида етиб бориш мумкин бўлган манзилларга  рейсларни тақиқлашни таклиф қилинган эди. Бироқ айрим ҳудудлар ва Air France KLM авиакомпанияси эътирозларидан сўнг, бу муддат икки ярим соатга қисқартирилди.