Россия Ғарб давлатларининг Украинадаги урушни музлатиб қўймаслик зарурлиги бўйича позициясига қўшилади, деди Россия президенти матбуот котиби Дмитрий Песков “ТАСС” агентлигига.
Кремль вакили Россия можаронинг музлатилишига йўл қўймасликни таъкидлаётган Ғарб билан “ҳамжиҳат” эканини айтди.
“Россия фақатгина махсус ҳарбий операцияни ўз манфаатларини таъминлаш, Россия олдида турган мақсадларга ё махсус ҳарбий операция ёки бошқа мавжуд воситалар билан эришиш орқали якунлаш имкониятини кўриб чиқмоқда ”, — дея қўшимча қилди у.
Агентликнинг урушни тинч йўл билан ҳал қилиш бўйича турли томонлар таклиф қилган режалардан қайси бири Москвага яқинроқ экани ва бу режа учун алоҳида вариант бор-йўқлиги ҳақидаги саволига жавоб берар экан, Песков “ҳозирча тинч йўл билан ҳал қилиш учун ҳеч қандай шарт-шароит йўқлигини” яна бир бор таъкидлади.
Аввалроқ Politico ўз манбаларига таяниб, АҚШ расмийлари бошқа эҳтимолий сценарийлар қаторида Россия—Украина уруши йиллар давомида музлатилган можарога айланиши эҳтимолини кўриб чиқаётгани ҳақида хабар берганди. Нашрнинг таъкидлашича, бу узоқ муддатли истиқболда энг ҳақиқатга яқин сценарий бўлиши мумкин, чунки на Москва, на Киев мағлубиятни тан олишга тайёр эмас.
Ғарб бир неча бор Россия ва Украина ўртасидаги урушни музлатишга қарши чиққан. Хусусан, АҚШ Давлат котиби Энтони Блинкен, Буюк Британия бош вазири Риши Сунак ва Германия канцлери Олаф Шольц бунга қарши экани ҳақида баёнот берган.
2022 йилнинг декабрида Украина президенти Владимир Зеленский ҳам Россия билан урушни музлатишга қаршилигини билдирганди. Украина етакчиси офиси раҳбари маслаҳатчиси Михаил Подолякнинг айтишича, можаро музлатилган тақдирда Украина “янги Шимолий Корея"га айланади.
Изоҳ (0)